Berkarar döwletiň täze eýýamynyň Galkynyşy döwründe Türkmenistan ekologiýa abadançylygyny üpjün etmekde hem-de daşky gurşawy goramakda dünýä derejesinde möhüm işleri durmuşa geçirýär. Ekologiýa meseleleri döwlet syýasatynyň ileri tutulýan ugurlarynyň biri bolup, halkymyzyň abadan durmuşyny, arassa tebigaty we baý ekologik mirasymyzy geljekki nesillere ýetirmek maksady bilen giň gerimli çäreler amala aşyrylýar.
Daşky gurşawy goramak we ekologiýa abadançylygyny pugtalandyrmak adamzadyň bagtyýar geljeginiň esasydyr. Türkmenistan bu ugurda sebit hem-de halkara guramalary bilen netijeli hyzmatdaşlyk edýär. Ýurt BMG-niň Azyk we oba hojalyk guramasy, Ählumumy ekologiýa gaznasy, Araly halas etmegiň halkara gaznasy, Merkezi Aziýanyň sebitleýin ekologiýa merkezi ýaly ýöriteleşdirilen edaralar bilen işjeň hyzmatdaşlyk alyp barýar. Şeýle hyzmatdaşlyklar Türkmenistanyň ekologiýa syýasatynyň halkara derejesinde ykrar edilýändiginiň subutnamasydyr.
Ýurt boýunça her ýyl geçirilýän agaç nahallaryny oturtmak çäreleri, baglara ideg etmek we tebigaty gözel saklamak işleri halkymyzyň arasynda asylly däbe öwrüldi. Bu çäreler diňe bir daşky gurşawy abadanlaşdyrmak bilen çäklenmän, eýsem tebigata jogapkärli çemeleşmegiň hem-de rejeli peýdalanmagyň medeniýetini ösdürmekde möhüm ähmiýete eýedir.
Ekologiýa syýasatynyň üstünlikli durmuşa geçirilmeginde ýaş nesliň gatnaşmagy aýratyn orun eýeleýär. Olaryň tebigata bolan söýgüsini, goragly garaýşyny ösdürmek, geljekde ekologiýa taýdan durnukly jemgyýetiň binýadyny berkidýär. Şu nukdaýnazardan, ekologiýa biliminiň giňden wagyz edilmegi, ýaşlaryň bu ugurda işjeň gatnaşmagy döwlet syýasatynyň möhüm bölegi hökmünde kabul edilýär.
Netijede, Türkmenistanyň ekologiýa syýasaty diňe bir milli däl, eýsem halkara derejesinde hem möhüm başlangyç hökmünde çykyş edýär. Tebigaty goramak, ekologiýa abadançylygyny üpjün etmek we geljekki nesiller üçin sagdyn gurşawy döretmek döwletimiziň parahatçylykly, durnukly we ösüşe gönükdirilen syýasatynyň aýrylmaz bölegidir.
Zekeriýa ETREKOW
Halkara ynsanperwer ylymlary we ösüş
uniwersitetiniň talyby
