Türkmenistanyň daşary syýasatynyň esasy ýörelgesi bolan hemişelik Bitaraplyk, halkara jemgyýetçiligi tarapyndan giňden goldanylýan we dünýäde parahatçylygy, durnuklylygy hem-de ösüşi üpjün etmäge gönükdirilen möhüm başlangyçdyr. Bu syýasatyň ähmiýeti, tutuş adamzadyň umumy ösüş maksatlaryna laýyklykda, häzirki zaman howplara bilelikde garşy durmakda we halkara gatnaşyklarynyň durnuklylygyny üpjün etmekde aýdyň ýüze çykýar.
1995-nji ýylyň 12-nji dekabrynda Birleşen Milletler Guramasynyň Baş Assambleýasy tarapyndan kabul edilen “Türkmenistanyň hemişelik bitaraplygy” atly ýörite Rezolýusiýa bilen Türkmenistan resmi taýdan hemişelik bitarap döwlet hökmünde ykrar edildi. Bu çözgüt, halkara tejribesinde bitaraplyk derejesiniň täze görnüşiniň kemala gelendigini görkezýär. Rezolýusiýanyň biragyzdan kabul edilmegi, Türkmenistanyň halkara abraýynyň ýokarydygynyň hem-de onuň parahatçylykly başlangyçlarynyň dünýä bileleşigi tarapyndan goldanylýandygyny tassyklaýar.
Häzirki wagtda Türkmenistanyň hemişelik Bitaraplyk derejesi sebitde durnuklylygy üpjün etmekde, geosyýasy we geoykdysady hyzmatdaşlygy ösdürmekde möhüm faktor hökmünde çykyş edýär. Bu syýasat, ýurtlaryň arasynda ynanyşmaga esaslanýan gepleşikleriň ýola goýulmagynda hem möhüm ähmiýete eýedir.
Türkmenistanyň Prezidentiniň alyp barýan içeri we daşary syýasaty halkymyzyň hoşniýetli goňşuçylyk däplerine esaslanýar we döwletimiziň halkara gatnaşyklaryndaky ornuny has-da berkidýär. Bitaraplyk syýasaty, üçünji müňýyllygyň esasy maksatlary bolan parahatçylyk, ykdysady ösüş we halkara hyzmatdaşlyk bilen utgaşyp, dünýäde täze diplomatik çemeleşmeleriň işlenip taýýarlanylmagyna mümkinçilik döredýär.
Türkmenistanyň daşary syýasat başlangyçlary tapgyrlaýyn amala aşyrylýar we bu ugurda gazanylýan üstünlikler, iri halkara guramalarynyň, aýratyn-da BMG-nyň ýokary hormatyna mynasyp bolmak bilen, ýurdumyzyň halkara abraýyny has-da ýokarlandyrýar. BMG-niň Öňüni alyş diplomatiýasy boýunça sebitleýin merkeziniň Aşgabatda döredilmegi hem Türkmenistanyň halkara hyzmatdaşlygynyň netijeli dowamydygyny görkezýär.
Netijede, Türkmenistanyň hemişelik Bitaraplyk syýasaty parahatçylygyň, ösüşiň we halkara hyzmatdaşlygyň ygtybarly binýady bolup durýar. Bu syýasat üýtgewsiz galyp, dünýäde durnuklylygyň we ynanyşmagyň esaslaryny berkitmäge gönükdirilýär.
Zekeriýa ETREKOW
Halkara ynsanperwer ylymlary we ösüş
uniwersitetiniň talyby
