Berkarar döwletiň täze eýýamynyň Galkynyşy döwründe ýaşlar ýurdumyzyň ösüşiniň güýçli hereketlendirijisi, Garaşsyz, hemişelik Bitarap Türkmenistanyň şöhratly geljeginiň berk binýady hökmünde çykyş edýärler. Olar halkymyzyň ruhy gymmatlyklaryna daýanýan, döwletiň ösüş strategiýasyny durmuşa geçirýän, döredijilikli we zähmetsöýer nesil bolup kemala gelýärler.
Gahryman Arkadagymyzyň hem-de Arkadagly Gahryman Serdarymyzyň taýsyz tagallalary bilen Türkmenistan bagtyýar çagalygyň mekanyna, arzuw-islegleriň hasyl bolýan ýurduna öwrüldi. Çagalaryň bagtyýarlygy – döwletimiziň iň uly baýlygy, jemgyýetiň durnukly ösüşiniň kepili hökmünde kabul edilýär. Ýaş nesliň abadançylygyny üpjün etmek, olaryň hukuklaryny we bähbitlerini goramak döwlet syýasatynyň ileri tutulýan ugurlarynyň biridir.
Türkmenistan BMG-niň Çagalar gaznasy bilen hyzmatdaşlykda ýaşlaryň sazlaşykly ösüşine, bilim we saglygy goraýyş ulgamynyň kämilleşdirilmegine, sagdyn durmuş ýörelgeleriniň ornaşdyrylmagyna gönükdirilen taslamalary üstünlikli amala aşyrýar. Şeýle hem, ýurdumyzda hereket edýän Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy ýaş nesliň durmuş goraglylygyny üpjün etmekde möhüm orun eýeleýär.
Her ýylyň 1-nji iýunynda giňden bellenilýän Çagalary goramagyň halkara güni ýurdumyzda ýaşlara berilýän ünsüň we aladanyň aýdyň beýanydyr. Çagalaryň zehinlerini ýüze çykarmak, bilim, sport we döredijilik ugurlarynda üstünlik gazanmaklary üçin ähli şertler döredilýär. Çagalar baglarynda, orta hem-de ýokary okuw mekdeplerinde ýaşlaryň ruhy we beden taýdan sagdyn ösmegi üçin döwrebap mümkinçilikler üpjün edilýär.
Arkadagly Gahryman Serdarymyzyň parasatly ýolbaşçylygynda durmuşa geçirilýän ýaşlar syýasaty, her bir ýaş raýata öz ukybyny doly açmaga, Watanyň ösüşine mynasyp goşant goşmaga giň ýol açýar. Ýaşlaryň innowasion pikirlenmegi, sanly tehnologiýalara erk etmegi we döredijilik mümkinçiliklerini ösdürmegi döwletimiziň ösüşiniň möhüm ugruna öwrüldi.
Häzirki wagtda ýaşlar ykdysadyýetde, ylymda, medeniýetde, sportda we jemgyýetçilik işlerinde ýokary netijeleri gazanýarlar. Ýaş alymlar, hünärmenler, talyplar we döredijilik işgärleri öz zähmetleri bilen ýurdumyzyň ösüşine mynasyp goşant goşýarlar. Olar ata Watanymyzyň parahatlygyny, ösüşini we beýik maksatlaryny goramakda möhüm orny eýeleýärler.
Türkmen ýaşlary – geljegimiziň altyn miweleri. Olaryň başarjaňlygy, giň gözýetimi we Watana bolan çäksiz söýgüsi ýurdumyzy has-da gülläp ösýän, bagtyýar döwlete öwürýär. Goý, ýaş neslimiziň bilim almagy, terbiýelenmegi we ösüşi üçin bimöçber aladalary edýän Gahryman Arkadagymyzyň hem-de Arkadagly Gahryman Serdarymyzyň janlary sag, belent başlary aman bolsun! Il-ýurt bähbitli tutumly işleri hemişe rowaç alsyn!
Melika ANNAMYRADOWA
Halkara ynsanperwer ylymlary we ösüş
uniwersitetiniň talyby
