Tebigat — adamzat güýjüniň we ýaşaýşynyň binýady. Arassa howa, süýji suw, bereketli toprak, ösümlik we haýwanat dünýäsiniň baýlygy şahsy we jemgyýet durmuşynyň berk sütunlarydyr. Halkymyz asyrlardan bäri tebigaty goramagy we ony aýawly saklamagy mukaddes borç hasaplapdyr. Häzirki döwürde bu borç diňe ruhy gymmatlyk däl, eýsem döwlet syýasatynyň esasy ugurlarynyň birine öwrüldi.
Hormatly Prezidentimiziň parasatly ýolbaşçylygynda ýurdumyzda daşky gurşawy goramak boýunça giň gerimli işler amala aşyrylýar. “Ýaşyl” döwlet syýasatynyň çäginde paýtagtymyz Aşgabadyň we welaýatlarymyzyň köçelerinde köpçülikleýin bag we agaç ekmek işlerine uly ähmiýet berilýär. Döwlet Baştutanymyzyň başlangyçlary bilen döredilýän tokaý zolaklary şäherleriň keşbini bezemek bilen bilelikde ekologiýa ýagdaýyny gowulandyrmaga, howa we suw çeşmeleriniň hilini ýokarlandyrmaga uly goşant goşýar.
Türkmenistanyň ekologiýa taslamalary, Aral deňzini halas etmäge bagyşlanan halkara başlangyçlary we BMG-de öňe sürýän teklipleri halkara hyzmatdaşlygynyň netijeli wekilidir. Daglarymyz, sähralarymyz, derýalarymyz, guşlaryň owazy we jandarlaryň köpdürlüligi — halkymyzyň milli döredijiligine, edebiýata we sungata çeşme bolup hyzmat edýär. Garaşsyzlyk ýyllarynda ýaşlaryň köpçülikleýin bag ekmek hereketlerine gatnaşmagy, ekologiýa boýunça halkara bäsleşiklerde gazanýan üstünlikleri olara ekologiýa medeniýetini we gorag düşünjesini berkitmäge kömek edýär.
Gözel tebigatymyzy goramak — her birimiziň mukaddes borjumyz. Ene topragyň baýlyklaryny gorap saklamak, ýaşyl zolaglary giňeltmek, suw çeşmelerini arassalamak, jandarlary we ösümlikleri goramak we olaryň ylmy esasda öwrenilmegine gatnaşmak şu günki hem geljekki nesillerimiziň bagtyýar ýaşaýşyny üpjün etmegiň esasy şertidir.
Ýazberdi GURBANÝAZOW
Halkara ynsanperwer ylymlary we ösüş
uniwersitetiniň talyby
