Gyrgyzystanyň paýtagty Bişkekde täze ýaşaýyş şäherçesi «Altai» gurulmaga başlandy. Taslamanyň açylyş dabarasyna Prezident Sadyr Japarow gatnaşyp, gurluşyga resmi taýdan badalga berdi.
Taslama 234 gektar meýdany öz içine alýar we sebitde iň iri gurluşyk başlangyjy bolar: 1 551 sany bäş gatly jaý, 34 004 öý, 50 gektar seýilgäh, 86 km ýol we 34 005 awtoulag duralga ýerleri göz öňünde tutulýar.
Şäherçede mekdepler, çagalar baglary, hassahanalar, reabilitasiýa merkezleri, polisiýa bölümleri we ýangyn gulluklary ýerleşer. Jaýlaryň 10%-i döwlet eýeçiligine berler.
Prezident Sadyr Japarow çykyşynda häzirki wagtda 200 müňden gowrak raýatyň ýaşaýyş jaýyna mätäçdigini belläp, şeýle taslamanyň döwrüň talaby bolup durýandygyny nygtady.
