2025-nji ýylyň 30-31-nji oktýabrynda Germaniýanyň Maýn boýundaky Frankfurt şäherinde Türkmenistanyň ykdysadyýet günleri üstünlikli geçirildi. Munuň özi ýewropaly maýadarlara döwletimiziň giň gerimli mümkinçiliklerini açyp görkezmegiň möhüm pursadyna öwrüldi.
Ykdysadyýet günleriniň umumy mejlisinde Türkmenistanyň Ministrler Kabinetiniň Başlygynyň orunbasary Nökerguly Atagulyýewiň we German ykdysadyýetiniň Gündogar komitetiniň Ýerine ýetiriji direktory Mihael Harmsyň çykyşlary diňlenildi. Mowzuklaýyn mejlislerde, B2B hem-de B2G görnüşli duşuşyklaryň dowamynda söwda-ykdysady gatnaşyklary işjeňleşdirmek, göni daşary ýurt maýa goýumlaryny çekmek, ulag-logistika geçelgelerini, energetika hyzmatdaşlygyny, «ýaşyl» ykdysadyýete geçmek, sanly özgertmeler, elektron hökümet ulgamyny ösdürmek ýaly ugurlarda netijeli pikir alyşmalar boldy.
Türkmenistanyň Söwda-senagat edarasynyň guramagynda, «Ojar Aziýa» we «John Deere» kompaniýalarynyň hemaýatkärliginde Maýn boýundaky şäherde geçirilen Türkmenistanyň ykdysadyýet günleri «TMT Consulting Group», «Ojar Aziýa», «Ýaş Syýahat», «Eminli maslahat», «Döwrebap ulag merkezi» ýaly hususy düzümleriň öňdebaryjy german kompaniýalary bilen dürli ugurlarda hyzmatdaşlyk etmek hakynda ikitaraplaýyn ylalaşyklara gol çekmegi bilen jemlendi.
«THE ASHGABAT TIMES».
