Özbegistan Respublikasynyň paýtagty Daşkent şäherinde Merkezi Aziýa döwletleriniň Baştutanlarynyň ýedinji konsultatiw duşuşygy bilen ugurdaşlykda geçirilen halkara forumda Babasary Annamyradowa milli sungatyň çeperçilik we amaly-haşam ugry boýunça «Geljegiň mirasy» atly halkara baýrak, degişli diplom we 10 müň amerikan dollary möçberinde pul sylagy gowşuryldy. Bu barada Özbegistanyň Prezidentiniň metbugat gullugy habar berýär.
Özbegistan Respublikasynyň Prezidentiniň Karary bilen esaslandyrylan bu halkara baýrak bilen edebiýat, medeniýet, sungat, ylym, bilim hem-de sanly tehnologiýalar ulgamlarynda uly üstünlik gazanan ýerli we daşary ýurtly döredijilik işgärleri sylaglanýar. Şeýlelikde, bu ýyl baýraga mynasyp bolanlar:
Edebiýat ugry boýunça ― TÜRKSOÝ-nyň Baş sekretary, Gyrgyzystanyň halk ýazyjysy Sultan Raýew;
Medeniýet ugry boýunça ― Täjigistanyň halk şahyry Dawlat Safarzada;
Teatr we kino ugry boýunça ―Gazagystanyň M.Awezow adyndaky Milli drama teatrynyň artisti Ýerkebulan Daýirow;
Saz we tans ugry boýunça ― Azerbaýjanyň halk artisti Alim Gasimow;
Çeperçilik we amaly-haşam ugry boýunça ― Türkmenistanyň halk suratkeşi Babasary Annamyradow;
Ylym, terbiýe we sanly tehnologiýalar ugry boýunça ― Özbegistanyň Oba hojalyk ministrliginiň ýanyndaky halkara merkeziň direktorynyň orunbasary, oba hojalyk ylymlarynyň doktory Dilfuza Egamberdiýewa.
«THE ASHGABAT TIMES».
