Berkarar döwletiň täze eýýamynyň Galkynyşy döwründe ýurdumyzda her ýylyň noýabr aýynyň ikinji ýekşenbesi aýratyn şatlyk bilen bellenilýär. Häzirki wagtda — Hasyl toýy, türkmen daýhanlarynyň halal zähmetine goýulýan belent sarpanyň, döwlet derejesinde berilýän hormatyň beýanydyr.
Topraga yhlas siňdirip, oba hojalyk ekinleriniň bol hasylyny ösdürip ýetişdirýän daýhanlarymyz ýurdumyzyň bereket-bolçulygyna saldamly goşant goşýarlar. Halkara parahatçylyk we ynanyşmak ýylynda hem olaryň yhlasly zähmeti öz miwesini berdi. Däneçilikde, ýüpekçilikde, maldarçylykda we beýleki ugurlarda gazanylan guwandyryjy netijeler halkymyzyň toý saçagyny datly, şirin önümler bilen bezedi
Güneşli Diýarymyzy gurşap alan Hasyl toýunyň dabaralary edermen zähmetkeşlerimiziň sahawatly topragyndan öndüren hasylyna bolan buýsanjyň nyşanydyr. Bu sene ulus-ilimiziň şatlygyna şatlyk goşup, beýik döwrümize bolan guwanjy has-da artdyrýar, päk zähmete bolan yhlasy güýçlendirýär.
Ösüş-özgertmelere beslenen döwrümizde ýurdumyzyň bereket-bolçulygyny üpjün edýän zähmetsöýer halkymyzyň öndürijilikli zähmeti eşretli durmuşyň binýadyny berkitýär. Hormatly Prezidentimiziň hem-de Gahryman Arkadagymyzyň taýsyz tagallalary netijesinde oba hojalygynda gazanylýan üstünlikler halkymyzyň bagtyýar durmuşynyň kepili bolup hyzmat edýär.
Şanly baýram gününde ähli ildeşlerimiz hormatly Prezidentimiziň we Gahryman Arkadagymyzyň janlarynyň sag bolmagyny, döwletli işleriniň rowaçlyklara beslenmegini arzuw edýärler. Hasyl toýy diňe bir daýhanlaryň zähmetiniň baýramy bolman, eýsem, ýurdumyzyň ösüşleriniň, halkymyzyň bagtyýar durmuşynyň hem dabarasydyr.
Zekeriýa ETREKOW
Halkara ynsanperwer ylymlary we ösüş
uniwersitetiniň talyby
