Hemişelik Bitaraplygymyz parahatçylygy, ynanyşmagy we hoşniýetliligi dünýä ýaýýan taglymat bolup, onuň mizemez ýörelgeleri öz gözbaşyny halkymyzyň asyrlaryň dowamynda kemala getiren we kämilleşdiren belent ynsanperwer ýörelgelerinden alýar. Muňa hormatly Prezidentimiziň «Türkmenistanyň Bitaraplygy — parahatçylygyň we ynanyşmagyň aýdyň ýoly» atly täze kitaby bilen içgin tanşanyňda göz ýetirmek bolýar.
Täze kitap giň okyjylar köpçüligini Birleşen Milletler Guramasynyň Baş Assambleýasy tarapyndan üç gezek ykrar edilen hemişelik Bitaraplygymyzyň taryhy, medeni we ruhy kökleri, onuň özboluşly aýratynlyklary, häzirki zaman dünýäsinde parahatçylyk we ynanyşmak ýörelgelerini ilerletmekdäki ähmiýetli orny bilen içgin tanyşdyrýar. Täze eser «Bitaraplyk — türkmen paýhasynda» atly bölüm bilen açylyp, onda her bir halkyň özüniň aýratynlyklary bilen tapawutlanýandygyna, bizi bezeýän häsiýetleriň halkymyzy beýgeldýän aýratynlyklardygyna, şol özboluşlylygyň Bitaraplyk filosofiýasynyň düýp binýadynda durandygyna aýratyn üns çekilýär.
Şeýle filosofiki pikirler kitabyň «Bitaraplygyň taryhy köklerine nazar aýlap», «Türkmenistan — Birleşen Milletler Guramasy: netijeli hyzmatdaşlygyň baý tejribesi», «Parahatçylyk we ynanyşmak — döwrüň derwaýyslygy», «Bitaraplygyň ynsanperwer ölçegi», «Türkmenistanyň «Açyk gapylar» syýasaty», «XXI asyr: Türkmenistanyň geosyýasy we geoykdysady strategiýasy» atly bölümlerinde dowam etdirilýär. Kitap üç dilde — türkmen, iňlis we rus dillerinde ýokary derejede neşir edilipdir.
Hormatly Prezidentimiziň bu eseri biziň her birimiz üçin gymmatly gollanmadyr. Täze kitap umumadamzat ähmiýetli meseleleri çözmekde, ählumumy parahatçylygy, ynanyşmagy we howpsuzlygy pugtalandyrmakda Türkmenistan döwletimiziň Bitaraplyk ýörelgelerini ileri tutup, hoşniýetli diplomatik gurallary öňe sürýändigini jahana ýaýýar.
Kasymmyrat DURDYÝEW,
Ýagşygeldi Kakaýew adyndaky Halkara nebit we gaz uniwersitetiniň mugallymy.
