Şu gün Türkiýäniň paýtagty Ankara şäherinde Türki döwletleriň guramasyna agza we synçy ýurtlaryň gatnaşmagynda ýalan maglumatlara garşy göreşmäge bagyşlanan halkara forum öz işine başlady. Bu möhüm çärä Türkmenistanyň wekilleri hem işjeň gatnaşýarlar.
«Report» azerbaýjan habarlar saýtynyň berýän maglumatyna görä, bu foruma gatnaşyjylaryň geografiýasy örän giňdir. Onda Azerbaýjanyň, Gazagystanyň, Gyrgyzystanyň, Türkiýäniň, Özbegistanyň, Wengriýanyň, Türkmenistanyň, şeýle hem Demirgazyk Kipr Türk Respublikasynyň resmi wekilleri bir ýere jemlendiler.
Çäre maglumat ulgamynyň ýokary wezipeli ýolbaşçylaryny, media wekillerini, ylmy jemgyýetiň agzalaryny, kommunikasiýa hünärmenlerini we žurnalistleri birleşdirýän täsirli hyzmatdaşlyk meýdançasy hökmünde hyzmat edýär.
Iki günüň dowamynda öz işini dowam etdirjek bu forum gatnaşyjy ýurtlaryň metbugat we aragatnaşyk hünärmenleri üçin uly mümkinçilikleri açýar. Habarda bellenilişi ýaly, forumyň çäklerinde žurnalistleriň özara tejribe alyşmagy, täze bilelikdäki taslamalaryň durmuşa geçirilmegi we hünär derejesindäki hyzmatdaşlygyň has-da giňeldilmegi meýilleşdirilýär.
