2025-nji ýylyň 13-nji dekabrynda Türkmenistanyň daşary işler ministri Raşid Meredow bilen Halkara parahatçylyk we ynamyşmak ýylyna, Halkara Bitaraplyk gününe we Türkmenistanyň hemişelik Bitaraplygynyň 30 ýyllygyna bagyşlanan halkara foruma gatnaşmak üçin Aşgabada gelen Eswatininiň Premýer-ministri Rassel Dlamininiň arasynda duşuşyk geçirildi.
Eswatininiň Premýer-ministri türkmen tarapyny ýurduň hemişelik Bitaraplygynyň 30 ýyllygy bilen gutlap, halkara forumyň ynanyşmak medeniýetini ösdürmek we häzirki zaman meseleleriniň çözgütlerini işläp düzmek üçin möhüm platforma hökmünde ähmiýetini belledi.
Syýasy gepleşikleriň we ýokary derejeli gatnaşyklaryň iki ýurduň arasyndaky özara düşünişmegi we ynamy pugtalandyrmaga uly goşant goşýandygy nygtaldy. Şu nukdaýnazardan, BMG-niň Deňze çykalgasy bolmadyk ösüp barýan döwletler boýunça üçünji maslahatynyň çäklerinde we BMG-niň Baş Assambleýasynyň 80-nji sessiýasynyň dowamynda Türkmenistanyň Prezidenti bilen Eswatininiň Patyşasynyň arasyndaky duşuşyklar boldy.
Söhbetdeşligiň dowamynda taraplar syýasy, diplomatik, söwda-ykdysady, medeni we ynsanperwer ulgamlarda ikitaraplaýyn gatnaşyklaryň ösdürilmegine degişli meseleleri ara alyp maslahatlaşdylar. Iki ýurduň işewür toparlarynyň arasynda gepleşikleri ýola goýmagyň zerurdygy bellenildi. Gürrüňdeşler halkara guramalarynyň, esasan hem, Birleşen Milletler Guramasynyň çäklerinde hyzmatdaşlygy pugtalandyrmaga özara ygrarlydyklaryny tassykladylar.
«THE ASHGABAT TIMES».
