2025-nji ýylyň 17-nji dekabrynda Aşgabatda geçirilen duşuşykda Türkmenistanyň Daşky gurşawy goramak ministri bilen Ispaniýanyň Russiýadaky we Türkmenistandaky ilçisi Rikardo Martínez Wázquez arasynda möhüm gepleşikler geçirildi. Duşuşykda Merkezi Aziýada ýerleriň zaýalanmagyna garşy göreşmek we çölleşmä garşy çäreleri güýçlendirmek boýunça hyzmatdaşlyk meseleleri ara alnyp maslahatlaşyldy.
Bu başlangyç Türkmenistanyň Prezidenti Serdar Berdimuhamedow tarapyndan Birleşen Milletler Guramasynyň Baş Assambleýasynda öňe sürlen teklip bilen baglanyşyklydyr. Hormatly Prezidentimiz sebitde çölleşmä garşy göreşmek üçin ýöriteleşdirilen sebitleýin merkez döretmek baradaky başlangyjy beýan edipdi. Maksat sebit döwletleriniň hyzmatdaşlygyny berkitmek, halkara tejribäni we maliýe serişdelerini çekmekdir.
Diplomatik çeşmelerde bellenilişi ýaly, gepleşikler diňe bir çölleşmä garşy göreş bilen çäklenmän, daşky gurşawy goramak, plastik galyndylary dolandyrmak we ekologiýa taýdan durnukly ösüş boýunça bilelikdäki taslamalary hem öz içine alýar.
Sebitleýin merkez döredilse, onuň işi:
• Merkezi Aziýa ýurtlarynda ýerleriň zaýalanmagyna garşy çäreleri utgaşdyrmak;
• Halkara tejribäni we ylmy barlaglary sebitde ornaşdyrmak;
• Maliýe serişdelerini we tehnologiýalary çekmek;
• Ekologiýa diplomatiýasyny ösdürmek;
• Sebitleýin hyzmatdaşlygy giňeltmek ýaly ugurlary öz içine alar.
Bu başlangyç Türkmenistanyň halkara ekologiýa syýasatynyň möhüm bölegi bolup, ýurduň durnukly ösüş maksatlaryna ýetmekde we sebitde ekologiýa howpsuzlygyny üpjün etmekde möhüm ädim hökmünde kabul edilýär.
«THE ASHGABAT TIMES».
