Täjigistan Respublikasynyň paýtagty Duşanbe şäherinde, Täjik milli uniwersitetiniň (Tajik National University) binýadynda «Merkezi Aziýanyň bilim we iş bilen üpjünçilik pudaklarynda ekologiýa meselelerini, sosial zerurlyklary we degişli dolandyryşy utgaşdyrmak» (ESGCA) atly halkara taslamanyň çäklerinde nobatdaky maslahat geçirildi. Bu möhüm çärä ýurdumyza wekilçilik edip, Ýagşygeldi Kakaýew adyndaky Halkara nebit we gaz uniwersitetiniň hem-de Türkmenistanyň Döwlet energetika institutynyň tejribeli mugallymlary we hünärmenleri gatnaşdylar.
«Nebit-gaz» gazetiniň berýän habaryna görä, sebitiň ylym-bilim wekillelerini bir ýere jemlän bu maslahatda durnukly ösüşiň häzirki zaman meseleleri giňden ara alnyp maslahatlaşyldy. Hususan-da, bilim ulgamynda ekologik taýdan arassa tehnologiýalary işläp düzmek we önümçilige ornaşdyrmak, ýaş nesliň daşky gurşawy goramak baradaky düşünjelerini düýpli kämilleşdirmek hem-de innowasion başlangyçlary maliýe taýdan goldamagyň mehanizmleri boýunça ýörite okuw maslahatlary geçirildi.
Maslahatyň çäklerinde guralan «tegelek stol» duşuşyklarynda Türkmenistanyň ekologiýa syýasaty we bu ugurda durmuşa geçirilýän döwlet ähmiýetli çäreler barada giňişleýin durlup geçildi. Türkmen wekilleri öz çykyşlarynda suw serişdelerini tygşytly ulanmagyň ylmy esaslary, alternatiw energiýa çeşmelerini özleşdirmegiň geljegi we döwrebap gidrologik tehnologiýalaryň önümçilikdäki ähmiýeti barada möhüm maglumatlary paýlaşdylar.
Şeýle-de, ýurdumyzyň ýangyç-energetika toplumy üçin möhüm bolan nebiti we gazy çuňňur gaýtadan işlemek, şol bir wagtyň özünde ekologiýa kadalaryny saklap, galyndysyz önümçilik tehnologiýalaryny kämilleşdirmek boýunça täze ylmy çemeleşmeler maslahatyň esasy mowzuklarynyň biri boldy. Gatnaşyjylar bu duşuşygyň Merkezi Aziýa ýurtlarynyň ylmy-bilim edaralarynyň arasyndaky tejribe alyşmak we hyzmatdaşlygy berkitmek üçin täze mümkinçilikleri açýandygyny nygtadylar.
