Her ýyl taryhy wakalar, şanly pursatlar bilen baýlaşýan jemgyýetçilik-syýasy durmuşymyz täze tapgyrlara ýol açýar. Halkymyzyň asuda hem abadan durmuşda ýaşamagy üçin amala aşyrylýan özgertmeler parahatçylyk söýüjilik, hoşniýetlilik we ynanyşmak ýörelgelerine daýanyp, ýurdumyzyň ösüş ýoluny has-da berkidýär.
Täze taryhy döwürde döwletimiziň dünýäde tutýan ornuny berkitmek, halkara hyzmatdaşlygyny giňeltmek, ynanyşmak we dostluk ýörelgelerine esaslanýan syýasaty wagyz etmek möhüm wezipedir. Türkmenistanyň hemişelik Bitaraplygynyň 30 ýyllyk şanly baýramy hem halkymyzyň gadymdan gelýän parahatçylyk, ynsanperwerlik we myhmansöýerlik däplerini dünýäde şöhratlandyrmaga mümkinçilik berýär.
Watan söýgüsi ähli duýgularyň gözbaşydyr. Dogduk mekana bagyşlanan iň ajaýyp aýdymlar, beýik şygyrlar halkymyzyň ýürekden gelýän buýsanjynyň beýanydyr. Oguz nesilleriniň watansöýüjilik, maşgala we il-güne ygrarlylyk nusgasy häzirki ýaşlara hem ýol görkezýär.
Berkarar döwletiň täze eýýamynyň Galkynyşy döwründe ýaş nesiller ata-babalarynyň beýik oguzlardygyna buýsanýarlar. Olar Gahryman Arkadagymyzyň hem-de Arkadagly Gahryman Serdarymyzyň ýolbaşçylygynda berk binýatly döwletde ýaşap, okaýarlar, döredýärler we ösüşe goşant goşýarlar.
Şonuň üçin hem bagtyýar ýaşlarymyz belent maksatlara tarap ynamly öňe barýan eziz Watanymyzyň daşyna jebisleşip, özlerine bildirilýän ýokary ynama mynasyp jogap bermek üçin yhlas bilen zähmet çekýärler. Bu jebislik wepalylygyň, watançylygyň hem-de beýik geljege bolan ynamyň beýanydyr.
Zekeriýa ETREKOW
Halkara ynsanperwer ylymlary we ösüş
uniwersitetiniň talyby
