Ispaniýanyň Super Kubogy ýaryşynyň finalynda “Barselonanyň” garşydaşy belli boldy. Ýarym finalyň çäginde geçirilen Madrid derbisinde “Real Madrid” özüniň esasy bäsdeşleriniň biri bolan “Atletikony” 2-1 hasabynda ýeňlişe sezewar etdi. Duşuşygyň eýýäm 2-nji minutynda Federiko Walwerde jerime urgusyndan uzak aralykdan ajaýyp gol urup, toparyny öňe saýlady.
Oýnuň ikinji ýarymynda “Realyň” hüjümleri dowam etdi we 55-nji minutda Rodrigo hasaby 2-0-a ýetirmegi başardy. Bu goldan bary-ýogy 3 minut geçensoň, Aleksander Sörlot “Atletiko” üçin bir gol urup, aratapawudy azaltsa-da, bu netije oýnuň gidişini üýtgetmäge ýeterlik bolmady. Şunlukda, Madrid derbisinden ýeňiş bilen çykan “Korollyk kluby” finala çykdy.
Dünýäniň ähli futbol janköýerleriniň sabyrsyzlyk bilen garaşýan “Barselona” we “Real Madrid” toparlarynyň arasyndaky uly final oýny 11-nji ýanwarda, ýekşenbe güni geçiriler. Bu gyzykly duşuşyk Aşgabat wagty bilen gije sagat 00:00-da badalga alar.
