Aşgabat, 2025-nji ýylyň 25-nji marty – 4-nji apreli – Türkmenistanda grip we öýken kesellerine wirusologiýa gözegçiligini güýçlendirmek maksady bilen Bütindünýä Saglyk Guramasynyň (BSG) ýurt boýunça ofisi BSG-nyň Ýewropa sebitleýin bölüminiň maslahat beriji-tehniki missiýasyny gurady. Missiýanyň çäginde, Ýewropa sebitleýin bölüminiň eksperti Dr. Darya Danilenko “Grip wiruslaryny tapmak we antigen häsiýetlerini öwrenmegiň aýratynlyklary” atly 10 günlük okuw kursuny geçirdi. Sapaklar Türkmenistanyň Saglygy goraýyş we derman senagaty ministrliginiň Döwlet sanitariýa-epidemiologiýa gullugynyň Halk saglygy we iýmit merkeziniň Wirusologiýa referensiýa laboratoriýasynda geçirildi.
Okuwyň esasy maksady, Türkmenistanyň Grip milli merkeziniň, BSG tarapyndan ykrar edilen, wirusologiýa barlaglaryny we laborator proseduralaryny ýokary derejede ýerine ýetirmek ukypyny ösdürmek bolup, kesellere gözegçiligi we monitoringi has-da täsirli etmekdir. Okuw döwründe gatnaşyjylar öýjükli medeniýetler bilen işlemek boýunça nazary we amaly ugurlary, şol sanda olaryň köpeldilmegini, saklanylmagyny we wirusologiýada ulanylyşyny öwrendiler. Şeýle hem öýjükli liniýalar bilen işlemek üçin zerur bolan sarp ediş materiallary we reagentler jikme-jik hödürlenildi.
Mundan başga-da, gatnaşyjylar grip wiruslaryny tapmak üçin öýjükli medeniýetleri geçirmek, konserwasiýa etmek we ýokaşdyrmak boýunça başarnyklary gazandylar. Grip wiruslaryny BSG-nyň halkara maslahatlaryna laýyklykda tapmak we antigen häsiýetlerini öwrenmek boýunça usullara aýratyn üns berildi. Missiýa, wirus kesellerini wagtynda we takyk tapmak bilen, grip gözegçilik ulgamyny kämilleşdirmäge ýardam berýär. Başlangyç Türkmenistanyň jemgyýetçilik saglygyny ösdürmäge bolan ygrarlylygyny nygtaýar we BSG-nyň Ýewropa sebitinde saglygy goraýyş ulgamyny güýçlendirmek boýunça giňişleýin tagallalaryna laýyk gelýär. Maslahat beriji-tehniki missiýa Türkmenistanda pandemiýa gripine taýýarlyk boýunça çarçuwa programmasy (PIP) taslamasynyň durmuşa geçirilmeginiň çäginde guraldy.
