Häzirki döwürde tebigy baýlyklarymyzy geljekki nesiller üçin gorap saklamak maksady bilen, ekologiýa taýdan arassa önüm bolan energiýanyň alternatiw, adaty däl, gaýtadan dikeldilýän çeşmelerinde yzygiderli ylmy-barlag işleri geçirilip, bu ugurda uly açyşlar edilýär. Gün energiýasy dünýäde iň amatly we ekologiýa taýdan arassa energiýa çeşmeleriniň biridir. Ol soňky ýyllarda oba hojalyk ulgamynda giňden peýdalanylyp başlandy. Bu ulgamda Gün energiýasynyň ulanylmagy ykdysady, daşky gurşaw we sosial meseleleri çözmäge mümkinçilik berýär.
Oba hojalygynda Gün energiýasyny ulanmagyň ilkinji we ähtimal iň möhüm tarapy, energiýa çykdajylaryny tygşytlamak ukybydyr. Gün panelleri elektrik nasoslary, suwaryş, yşyklandyryş we beýleki ýagdaýlar üçin ulanylyp bilner. Bu adaty energiýa çeşmelerine baglylygy, energiýa çykdajylaryny azaldýar.
Onuň peýdaly ikinji tarapy daşky gurşawyň düzüm bölegi bilen bagly. Gün energiýasynyň ulanylmagy daşky gurşawy arassa saklap, adamlara, haýwanlara we janly tebigata ters täsirini ýetirmeýär. Şeýle hem parnik gazlarynyň zyňyndylaryny azaldýar we sebitdäki daşky gurşawyň ýagdaýyny gowulandyrýar.
Bu tebigy energiýa, üçünji bir tarapdan, sosial düzüme ýeňillikleri döredýär. Oba hojalygynda Gün energiýasynyň ulanylmagy oba ilatynyň ýaşaýyş, iş şertlerini gowulandyrýar. Gün panelleri ammarlary we beýleki jaýlary yşyklandyrmak üçin ulanylyp bilner. Bu, esasan hem, uzak we ýagty yşyklandyrylan ýerlerde oba ýaşaýjylarynyň durmuş derejesini, işjeňligini ýokarlandyrýar.
Oba hojalygynyň öndürijiliginiň ýokarlanmagy onuň bähbitli dördünji tarapydyr. Gün energiýasynyň ulanylmagy öndürijiligi, önümiň hilini ýokarlandyrmak üçin şert döretmäge mümkinçilik berýär. Gün panelleri suwaryşda, suw çykdajylaryny azaltmakda, ekin hasylyny ýokarlandyrmakda hem ähmiýetlidir. Şeýle-de Gün energiýasyny ekinleriň hilini, hasyllylygyny ýokarlandyrýan topragy ýylatmak ulgamyny güýçlendirmek üçin-de ulanyp bolar.
Umuman, tebigy şöhlä, ýylylyk goruna baý ata Watanymyzda Gün energiýasyndan ýerlikli peýdalanyp, oba hojalygynda köp mümkinçilikleri döredip, öňegidişlikleri gazanyp bileris.
Aýhan ÖWEZDURDYÝEW
Ýagşygeldi Kakaýew adyndaky
Halkara nebit we gaz uniwersitetiniň talyby
