Garaşsyzlyk baýramynyň öňüsyrasynda paýtagtymyz Aşgabatda täze ýolagçy awtobuslary gatnawyna başlady. Bu täze ulaglar şäher ýaşaýjylaryna we myhmanlaryna amatly, döwrebap we howpsuz ýol şertlerini hödürleýär.
Täze awtobuslar Hytaýyň Yutong kompaniýasy tarapyndan öndürildi. 12 metr uzynlykdaky ulaglar üç gapy bilen enjamlaşdyrylyp, ýolagçylaryň amatly girip-çykmagyny üpjün edýär. Içiniň giňligi, ýumşak oturgyçlar, USB zarýad portlary we sowadyjy ulgamy bilen awtobuslar häzirki zaman talaplaryna doly laýyk gelýär.
Ulaglaryň hereketlendirijileri halkara Euro-5 ekologik standartlaryna laýyk gelýär. Mundan başga-da, awtobuslaryň hereketi we sürüjiniň işi häzirki zaman wideo gözegçilik ulgamy bilen yzygiderli gözegçilikde saklanýar. Tölegler sanly ulgam arkaly amala aşyrylýar, bu bolsa ýolagçylar üçin tiz we amatly hyzmaty üpjün edýär.
Täze awtobuslarda syýahat eden ilkinji ýolagçylar ulaglaryň rahatlygyny we sesizligini aýratyn bellediler. Paýtagtyň jemgyýetçilik ulag parkynyň täze awtobuslar bilen baýlaşdyrylmagy şäher infrastrukturasynyň kämilleşdirilmeginde möhüm ädim hökmünde garalýar.
