Garaşsyz, hemişelik Bitarap Türkmenistan döwletimiz Berkarar döwletiň täze eýýamynyň Galkynyşy döwründe halkara gatnaşyklaryň we parahatçylyk söýüjilikli syýasatyň täze belentliklerine ynamly gadam basýar. Hormatly Prezidentimiz Arkadagly Gahryman Serdarymyzyň we Milli Liderimiz Gahryman Arkadagymyzyň parasatly baştutanlygynda ýurdumyz dünýäniň iň abraýly guramasy bolan Birleşen Milletler Guramasy bilen netijeli we strategik hyzmatdaşlygy yzygiderli ösdürýär. 1995-nji ýylda BMG-ä agza ýurtlaryň biragyzdan goldamagy bilen hemişelik Bitaraplyk hukuk derejesine eýe bolan ýurdumyz, geçen döwür içinde dünýäde parahatçylygy we durnuklylygy üpjün etmekde möhüm orun eýeledi. Ählumumy derejede howpsuzlygy pugtalandyrmaga goşýan saldamly goşandy netijesinde, Türkmenistanyň Bitaraplygy 2015-nji ýylda BMG-niň Baş Assambleýasynyň 69-njy mejlisinde ähli agza döwletler tarapyndan ikinji gezek ykrar edildi.
Baky Bitaraplygymyzyň şanly 30 ýyllygynyň dabaraly bellenilýän häzirki ýylynda bolsa, Birleşen Milletler Guramasynyň taryhy Kararnamasy esasynda ýurdumyzyň Bitaraplyk hukuk derejesiniň üçünji gezek tassyklanmagy mähriban Watanymyzyň halkara abraýynyň has-da belende göterilýändiginiň subutnamasyna öwrüldi. Bu waka Gahryman Arkadagymyzyň öňe süren hoşniýetli goňşuçylyk strategiýasynyň we Arkadagly Gahryman Serdarymyzyň daşary syýasatda gazanýan uly üstünlikleriniň dabaralanmasydyr. Türkmenistanyň BMG-niň Baş Assambleýasynyň 79-njy mejlisiniň wise-başlyklygyna saýlanylmagy, şeýle hem ýurdumyzyň başlangyjy bilen «2025-nji ýyl — Halkara parahatçylyk we ynanyşmak ýyly» hem-de «Merkezi Aziýa — parahatçylyk, ynanyşmak we hyzmatdaşlyk zolagy» atly Kararnamalaryň biragyzdan kabul edilmegi dünýä döwletleriniň Türkmenistana bolan sarsmaz ynamyny aýdyň görkezýär.
Parahatçylyk we ynanyşmak diňe bir syýasy düşünjeler bolman, eýsem olar adamzadyň abadan geljegini gurmagyň esasy gymmatlyklarydyr. Gahryman Arkadagymyzyň we Arkadagly Gahryman Serdarymyzyň ajaýyp eserlerinde türkmen halkynyň parahatçylyk söýüjilikli ýörelgeleri, baý taryhy we ynsanperwerlik mekdebi giňişleýin beýan edilýär. Bu eserler häzirki wagtda döwletleriňdir halklaryň arasynda dostlukly hyzmatdaşlygyň baş ýörelgesine öwrüldi.
Aýlar AKMYRADOWA
Halkara ynsanperwer ylymlary we ösüş
uniwersitetiniň talyby
