Dünýäniň iň iri azyk öndürijileriniň biri bolan Nestlé birnäçe ýurtlarda — şol sanda Özbegistan, Gazagystan, Türkiýe hem-de başga-da 20 döwletiň bazarlarynda käbir çaga iýmitleriniň satuwyny wagtlaýyn togtatdy. Bu ädim önümleriň düzüminde ýüze çykmagy mümkin bolan toksin galyndylary bilen bagly howpsuzlyk aladalary sebäpli edildi.
Kompaniýanyň resmi beýanatynda aýdylmagyna görä, barlaglaryň dowamynda käbir partiýalarda saglyga zyýan ýetirip biljek maddalaryň bolmagy ähtimal edilipdir. Nestlé bu ýagdaýyň çaga saglygy üçin töwekgelçilik döredip biljekdigini göz öňünde tutup, degişli önümleriň ählisini bazardan yzyna çagyrdy.
Toksiniň täsirleri barada berlen maglumatda onuň:
- gusmak,
- öýkeniň agyrma,
- iýmit siňdiriş bozulmalary ýaly alamatlary döredip biljekdigi bellenilýär.
Nestlé häzirki wagtda ähli degişli partiýalar boýunça goşmaça barlaglary geçirýär hem-de ýurtlaryň saglygy goraýyş edaralary bilen ýakyn hyzmatdaşlykda işleýär. Kompaniýa müşderilere howpsuzlyk çäreleri hökmünde degişli seriýaly önümleri ulanmazlygy we satyn alnan ýerlerine yzyna gaýtarmagy maslahat berýär.
Bu wakanyň fonunda birnäçe ýurtlaryň gözegçilik edaralary hem öz nobatynda barlaglary güýçlendirdiklerini, çaga iýmitleriniň hiline we howpsuzlygyna aýratyn üns berilýändigini mälim etdiler.
Nestlé bu ýagdaýyň tiz wagtda doly seljeriljekdigini, ähli önümçilik tapgyrlarynyň gaýtadan gözden geçiriljekdigini we müşderileriň ynamynyň dikeldilmegi üçin zerur çäreleriň görülýändigini aýtdy.
