Dünýäniň öňdebaryjy senagat we energetika kompaniýalarynyň biri bolan General Electric (GE) Türkmenistanyň energetika ulgamynda 20 ýyldan gowrak wagt bäri dowam edýän hyzmatdaşlygyny täze taslamalar bilen giňeldýär. Kompaniýa ýurduň elektrik üpjünçiligini döwrebaplaşdyrmak, önümçilik kuwwatyny artdyrmak we ýokary tehnologiýaly hyzmatlary ýola goýmak boýunça möhüm başlangyçlara gatnaşýar.
Türkmenistanda soňky ýyllarda amala aşyrylan iri energetika taslamalarynyň birnäçesi GE-niň tehnologiýalaryna esaslanýar. Mary döwlet elektrik stansiýasynyň giňeldilmegi we döwrebaplaşdyrylmagy netijesinde ýurduň elektrik energiýasyny eksport etmek mümkinçiligi ep-esli artdy. Taslama häzirki wagtda Türkmenistanyň sebitde energetika merkezine öwrülmegine ýardam edýär.
2022-nji ýylda Aşgabatda açylan GE hyzmat merkezi Merkezi Aziýada ilkinji bolup, gaz turbinalarynyň hyzmaty, tehniki abatlaýyş işleri we milli hünärmenleriň taýýarlygy boýunça möhüm orny eýeleýär. Bu merkez ýurdumyzyň energetika ulgamynda ýokary tehnologiýalaryň ornaşdyrylmagyny çaltlandyrýar.
Aşgabat şäheriniň elektrik üpjünçiligini dolandyrmak boýunça täze taslamalarda hem GE-niň enjamlary we çözgütleri giňden ulanylýar. Bu işler paýtagtyň energiýa howpsuzlygyny ýokarlandyrmaga, ulgamda durnuklylygy üpjün etmäge we sarp edijilere hyzmatyň hilini ýokarlandyrmaga gönükdirilendir.
General Electric kompaniýasy Türkmen–Amerikan işewürlik geňeşiniň işjeň gatnaşyjysy bolup, iki ýurduň arasyndaky ykdysady hyzmatdaşlygyň ösdürilmegine goşant goşýar. Kompaniýanyň ýolbaşçylary Türkmenistanyň energetika pudagynyň mümkinçilikleriniň ýokarydygyny we hyzmatdaşlygyň geljekde hem giňeldiljekdigini belleýärler.
General Electric bilen Türkmenistanyň arasyndaky hyzmatdaşlyk diňe bir iri taslamalar bilen çäklenmän, eýsem, ýokary tehnologiýalaryň ornaşdyrylmagy, milli hünärmenleriň taýýarlanylmagy we energiýa howpsuzlygynyň pugtalandyrylmagy ýaly ugurlarda hem möhüm ähmiýete eýedir.
Arslan JANMYRADOW
Türkmenistanyň Döwlet energetika institutynyň mugallymy
