Türkmenistanyň daşary işler ministriniň orunbasary Ahmet Gurbanow 3-nji dekabrda Meşhedde täze bellenen Oman ilçisi (Ankarada ýerleşýän) Saif Bin Raşid Bin Saif Al-Jahwari bilen duşuşdy. Diplomatlar döwletara hyzmatdaşlygyň ösmegini ara alyp maslahatlaşdylar.
Ahmet Gurbanow we Saif Bin Raşid Bin Saif Al-Jahwari syýasy-diplomatik ugurda hyzmatdaşlygy ara alyp maslahatlaşdylar. Şu nukdaýnazardan, olar 2025-nji ýylda daşary syýasat edaralarynyň derejesinde özara saparlary guramagyň mümkinçiliklerini gözden geçirdiler.
Taraplar söwda-ykdysady ugurda hyzmatdaşlygyň ösmegine gyzyklanma bildirdiler. Gepleşikde nebit-gaz pudagynda, oba hojalygynda, dokma senagatynda hyzmatdaşlyk mümkinçilikleriniň bardygyny belläp, “Özbegistan-Türkmenistan-Eýran-Oman” halkara transport-tranzit geçelgesiniň mümkinçiliklerinden peýdalanmagyň zerurdygyny nygtadylar.
Mundan başga-da, diplomatlar bilelikdäki çäreleri, şol sanda işewürlik forumlaryny, sergileri, iki ýurduň işewür toparlarynyň arasynda göni aragatnaşyklary ýola goýmagy, özara Medeniýet günlerini geçirmegi ara alyp maslahatlaşdylar.
