Gahryman Arkadagymyzyň bilim özgertmelerindäki adyl başlangyçlaryny mynasyp dowam etdirýän Hormatly Prezidentimiziň ýolbaşçylygynda häzirki wagtda Diýarymyzda S. A. Nyýazow adyndaky Türkmen oba-hojalyk uniwersitetiniň, S. Seýdi adyndaky Türkmen döwlet mugallymçylyk institutynyň, Türkmen döwlet binagärlik-gurluşyk institutynyň täze binalar toplumy hem-de Türkmenistanyň Döwlet energetia institutynyň goşmaça okuw binasynyň, sport desgasynyň hem-de umumy ýaşaýyş jaýynyň gurluşygy giň gerimde alnyp barylýar. Şonuň bilen birlikde-de bu okuw jaýlaryny täze tehnologiýalar, okuw esbaplary, tejribe enjamlary bilen üpjün etmek işlerine uly ähmiýet berilýär.
Ýaňy – ýakynda Türkmen döwlet binagärlik – gurluşyk institutynyň professor – mugallymlary Germaniýa Federatiw Respublikasynda iki hepdelik iş saparynda boldular. Saparyň dowamynda olar Germaniýanyň hem-de beýleki ösen Ýewropa ýurtlarynyň öndürýän, tejribe hem-de amaly sapaklarymyzda zerur bolan enjamlaryň iň täze, iň kuwwatly kysymlary bilen has içgin tanyşdylar.
Şeýle kämil enjamlary dolandyryp biljek, ýurdumyzyň gurluşyk ulgamyny mundan beýläk-de gülledip ösdürmekde zähmetlerini gaýgyrmaýan hünärmenleri taýýarlaýan ýokary okuw mekdebimiziň iş saparyna giden işçi düzümleri birnäçe enjamlary sargyt etmek meselesine seretdiler. Bu aýdylanlara gurluşyk materiallaryny synagdan geçirmek üçin, göteriji we daşaýjy maşynlaryň berkligine barlaglaryny geçirmek, nano bölejikler bilen bagly ölçegleri geçirmek, elektrik gurluşlary synagdan geçirmek bilen bagly enjamlary, elektron enjamlaryň düzüm böleklerini, kompýuter gurluşlaryň toplumlary, dürli fiziki – himiki maddalary we ş.m. mysal getirmek bolar.
Arslan JORAÝEW
Türkmen döwlet
binagärlik-gurluşyk
institutynyñ talyby
