Uçmak höwesi adamzat döräli köpleriň esasy arzuwynda bolup gelýär. Dürli dürli uçujy enjamlarydyr gurluşlary döreden alymlar ilkinji uçuşy howa şarynda synagdan geçirýärler. Emma häzirki wagtda uçarlaryň, dik uçarlaryň dürli görnüşleri syýahatçylaryň islendik isleglerini kanagatlandyrmaga gönükdirilendir. Indi Ýer şarynyň bir nokadyndan beýleki nokadyna sanlyja sagatlarda barmak mümkinçiligi bar. Geliň dünýädäki iň gysga aralyklardaky uçuşlar bilen tanşalyň.
Bir ýarym minut dowam edýän iň gysga uçuş ýolunyň uzynlygy 2,73 km bolup, bu beýleki uçuş-gonuş zolaklarynyň uzynlygyndan hem azdyr. Şotlandiýanyň “Loganair” awiakompaniýasy Şotlandiýanyň demirgazyk kenaryndaky Westraý adalary bilen Papa Westraý adalarynyň arasynda sekiz orunlyk “Britten-Norman Islander” uçarynda ýarym asyr bäri şeýle uçuşlary amala aşyrýar. Bu uçuşlary esasan adanyň ýaşaýjylary gündelik zerurlyklary üçin ulanýarlar. Ýöne syýahatçylar we awiasiýa höwesjeňleri üçin iň halanýan ugur bolmagynda galýar.
Dünýädäki beýleki gysga uçuşlar:
Connemara – Inişmaan uçuş gatnawy. Irlandiýa degişli bolup, 18 km uzynlykly uçuş üçin 10 minut wagt gerek.
Keramatly Martin – Anguilla. Karib deňzindäki bu uçuşyň uzynlygy – 19,11 km bolup, bary-ýogy 10 minut dowam edýär.
Dünýäniň iň gysga howa ýollarynyň sanawyna başga bir gatnaşyjy Peterburgdan uçýan uçuşdyr. Dogrusy, ol Sankt-Peterburg şäherinden däl-de, ABŞ-nyň Alýaska ştatynda ýerleşýän Peterburg şäherinden uçýar. Uçar bu ýerden başga bir “rus” ady bolan bir ýere – şol bir adadaky Wrangele uçýar. Ýigrimi minudyň dowamynda 48 km ýoly geçýän bu gatnaw tebigy şertler üçin iň möhüm transport serişdesi hökmünde hasaba alnandyr.
Akmyrat ABAÝEW
Türkmenistanyň Döwlet
energetika institutynyň talyby
