Syýahat edeniňizde, elektron enjamlar hem iýmit we ýaşaýyş jaý ýaly esasy zerurlykdyr. Daşary ýurda gideniňizde elektron kömekçileriň size oňaýsyzlyk bermezligi üçin, barjak ýurtlaryňyzdaky rozetkalary we naprýaženiýäni öňünden kesgitläň.
Dürli ýurtlaryň naprýaženiýe, ýygylyk we elektrik wilkasy hem-de rozetkasy üçin öz standartlary bar. Syýahat etmezden ozal göz öňünde tutmaly iki esasy zat:
1) Rozetkanyň (sokuçyň) görnüşi – başgaça aýdylanda, onuň näçe deşigi bar we olaryň nirede ýerleşýändigi. Utgaşyk meselesi adaty adapter bilen çözülýär. Olaryň içinde hiç hili öwrülişik ýok, ýöne wilkany rozetka mehaniki birikdirmäge mümkinçilik berýär. Dürli rozetkalara serediň, barjak ýurduňyzda haýsy rozetkanyň bardygyny biliň we adapter satyn alyň;
2) Naprýaženiýe. Dünýäde rozetkalara gelýän elektrik togunyň iki naprýaženiýe diapazony(çägi) bar: 100–127 wolt we 220–240 wolt. Bu görkeziji boýunça ýurduň sanawyna serediň: Ol ýurt haýsyna degişli? Döwrebap enjamlaryň köpüsi diýen ýaly iki diapazondada (çäkdede) işleýär – bu köplenç goşmaça bir iş etmegiň zerurlygynyň ýokdugyny aňladýar.
Emma kadadan çykmalar bar. Köne enjamlar bir diapazona ýa-da belli bir naprýaženiýe üçin niýetlenen bolup biler. Bu esasanam ýyladyş enjamlary: saç guradyjylar, ütükler we çäýnekler üçin häsiýetli.
Smartfon, kompýuter ýa-da başga enjamy niýetlenilmedik naprýaženiýasynda ulanmagyň birnäçe usuly bar.
1) Enjamyň daşarky elektrik zarýad üpjünçiligi bar bolsa (zarýad beriji ýa-da adapter hem diýilýär), syýahat üçin zerur naprýaženiýede işläp biljek başga birini satyn alyň. Dünýäniň köp ýurtlarynda 220–240 wolt, Amerikada bolsa 120 wolt tokly rozetkalar bar. Sanawy ulanmak arkaly, gidilýän ýurtda elektrik naprýaženiýesini barlaň;
2) Daşarky elektrik üpjünçiligi ýok bolsa, mysal üçin, 220 woltlyk saç guradyjy bilen Amerika gidýärsiňiz, onda inwertor – naprýaženiýe öwrüjisini ulanyp bilersiňiz. Ýöne syýahat üçin özünde wolt özgerdijisi bolan ýa-da degişli naprýaženiýe üçin saç guradyjyny satyn almak has aňsat bolup biler.
Salyh ATAÝEW
Türkmenistanyň Döwlet
energetika institutynyň talyby
