2024-nji ýylyň 25-nji iýunynda Aşgabatda Dokma senagaty ministrliginiň garamagyndaky «Dokmaçylar» medeni merkeziniň açylyş dabarasy boldy. Paýtagtyň Seýdi köçesiniň ugrunda ýerleşýän medeni merkeziň gurluşygynyň taslamasy iki ýylyň dowamynda durmuşa geçirildi.
Çärä Dokma senagaty ministrliginiň ýolbaşçylary we wekilleri, Türkmenistanyň halk artisti Jemal Saparowanyň ýolbaşçylygyndaky «Dokmaçylar» folklor-etnografik tans topary, medeniýet işgärleri, hormatly ýaşulular we ýurdumyzyň kümüş saçly eneleri gatnaşdylar.
Dabara tans toparynyň şowhunly çykyşlary bilen badalga aldy. «Dokmaçylar» ansambly birnäçe ýyl bäri aýratyn milli öwüşginli hereketleri bilen türkmen milli tanslaryny ýerine ýetirip gelýärler.
Ansamblyň oglan-gyzlar elmydama milli saz gurallaryň şirin owazynyň we halk aýdymlaryň astynda ajaýyp tans eserlerini döredýärler. Çärä gatnaşyjylar sungat işgärleriniň ýerine ýetiren çykyşlaryny şowhunly el çarpyşmalar bilen goldadylar.
Täze «Dokmaçylar» medeni merkezi ýaşlara häzirki zaman ülňülerine doly laýyk gelýän ajaýyp binada işlemäge we döretmäge mümkinçilik döreder.
Täze binada döwrebap enjamlaşdyrylan uly tans zallary, geýim otaglary, sport zallary, fitnes otaglary, ýazgy studiýalary we beýleki döredijilik bölümleri hereket edýär.
