Her bir hünärmeniň zähmet çekýän ýerindäki wezipe borçlaryna düşünip, oňa yhlasly zähmet siňdirmegi gerek. Mugallymçylyk işinde bu jogapkärçilik has hem uly. Munda mugallymyň çaga bilimi terbiýe bilen bilelikde öwretmegi zerur bolup durýar. Munuň üçin bolsa mugallymyň işe bolan höwesiniň, başarnygynyň has-da kämil bolmagy gerek. Bu hakynda «Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasynda» hem bellenilýär. Has takygy, bilim özgertmelerini has-da işjeňleşdirmek, pedagog işgärleri hünär taýdan taýýarlamak we gaýtadan taýýarlamak, hünär başarnyklaryny kämilleşdirmek, bilimiň usulyýet binýadyny nazaryýet we amalyýet taýyndan işlemek, okuw-tejribede berkitmek möhümdir. Umumybilim edaralarynda okuwçylaryň okuw ýüküne laýyk getirilen bilimleriň esaslaryny goýmak, olaryň zähmet endikleriniň ösdürilmegi, ýokary ahlak sypatlarynyň, belent adamkärçilik duýgularynyň, sagdyn durmuş ýörelgeleriniň terbiýelenmegi mugallymlaryň hemişe üns merkezinde bolmalydyr.
Her bir ýurduň geljegini onuň ylym-bilimli, sowatly ýaşlary bilen ölçerip bolýar. Şeýle ýaşlary kemala getirmekde ýokary okuw mekdepleriniň mugallymlarynyň eýelän orny diýseň uludyr. Çaga mekdepde okuwçy döwründe, ilki bilen, sowat, soňra bolsa bilim alýar. Orta mekdepde alan bilimlerini ýokary okuw mekdebinde kämilleşdirip, ähli zady ylmy esasda, ylmy tarapdan öwrenýär. Şu ýerde ýokary okuw mekdebiniň mugallymynyň pedagogiki ussatlygy, wezipesi, borçlary ýüze çykýar. Mugallymyň abraýy okuwyň netijeleri bilen gönüden-göni baglanyşykly bolýar. Mugallym üçin ýokary pedagogiki medeniýet örän möhümdir.
Mugallym hoşniýetlilik, zähmetsöýerlik, dogruçyllyk, erjellik, tutanýerlilik, adalatlylyk ýaly oňyn häsiýetlere eýe bolmalydyr. Ýokary okuw mekdebiniň mugallymynyň talyplaryň başarnyklaryna ynanmagy we olaryň öwrenmek isleýän zatlaryny berip bilmegi möhümdir.
Mugallymçylyk işinde halypa-şägirt gatnaşyklaryna hem uly hormat goýulýar. Mugallymçylyk kärine gelen ýaş hünärmenlerimize döwrebap iş usullaryny öwretmekde, tehnologiýalardan peýdalanyp, sapak guramakda hem halypa mugallymlar bilen bilelikde işler alnyp barylýar. Halypa mugallymlar ýaş hünärmenlere degerli maslahatlary berýärler. Olara Gahryman Arkadagymyzyň paýhasyndan dörän ajaýyp eserler uly gollanma bolup durýar. Bu bolsa ýaş hünärmenlerimiziň işleriniň kämilleşmegine ýardam berýär.
Yslamberdi TYLLANUROW,
Türkmen döwlet binagärlik-gurluşyk institutynyň uly mugallymy
