S.Seýitnazar Seýdi adyndaky Türkmen döwlet mugallymçylyk instituty 4-nji dekabrda türkmen we daşary ýurt uniwersitetleriniň talyplarynyň arasynda IV açyk halkara internet-fizika olimpiadasyny geçirer. Bu barada “Türkmenistan: Altyn asyr” elektron gazeti habar berdi.
Olimpiada türkmen, rus we iňlis dillerinde şahsy bäsleşik görnüşinde geçiriler. Gatnaşýanlar iki ýarym sagadyň dowamynda mehanika, elektrodinamika, optika we molekulýar fizika boýunça bäş meseläni çözmelidirler. Her uniwersitetden dürli hünärlerden bäş talyp gatnaşyp biler.
Žýuri agzalaryna degişli uniwersitetleriň mugallymlary we Türkmenistanyň hem-de daşary ýurtlaryň ylmy-bilim birleşikleriniň wekilleri girer. Bäsleşik ylmy işlere gyzyklanýan zehinli ýaşlary ýüze çykarmak we höweslendirmek, şeýle hem Türkmenistanyň we daşary ýurtlaryň uniwersitetleri we ylmy birleşikleri bilen hyzmatdaşlygy ösdürmek maksadyny göz öňünde tutýar.
