Halkymyzyň asyrlaryň jümmüşine uzap gidýän baý taryhy bar. Şöhratly geçmişimiziň janly şaýatlary bolan ýadygärliklerimiz, galalarymyz, keramatly ýerlerimiz türkmeniň gadymy taryhy barada dünýä ýaň salyp, gaýtalanmajak täsin keşbi, milli binagärlik aýratynlygy bilen göreni haýran edýär. Bu toprakda il-günüň aladasyny edip, beýik işleri bitiren, halkyň agzybir, erkin, ylymly-bilimli bolmagy ugrunda göreşen mert gahrymanlar, dana alymlar, zehinli şahyrlar ýaşap geçipdir. Baý medeni mirasy, taryhy gymmatlyklary özünde jemläp, milli medeniýetiň, sungatyň, döredijiligiň gülläp ösen, akyldar şahyr Magtymguly Pyragynyň ýaşap geçen türkmen topragy geçmişde hem dünýäniň ünsüni özüne çekipdir. Asyrlar aşyp, halkymyzyň hakydasynda baky ýaşap gelýän bu hakykatyň Gahryman Arkadagymyzyň «Hakyda göwheri» atly ajaýyp eserinde giňden beýanyny tapmagy diýseň buýsandyrýar.
Milli Liderimiziň halkymyzyň bütin taryhyň dowamynda döreden hem-de häzirki nesillere miras galdyran milli gymmatlyklaryna, şan-şöhratly ýoluna, taryhda yz galdyran şahsyýetlerine bagyşlan täze kitaby ýaş nesiller üçin gymmatly hazyna çeşmesidir.
Gahryman Arkadagymyzyň Magtymguly Pyragynyň döreden eserleriniň adamzat gymmatlyklaryna ýetiren täsirine aýratyn ähmiýet bermegi ýaş nesillerde şahyryň baý edebi mirasyna bolan söýgini has-da artdyrar. Arkadagly Gahryman Serdarymyzyň aýdyşy ýaly, Pyragynyň ajaýyp goşgulary ähli nesiller üçin berk taglymat, uly mekdepdir.
Şöhratly taryhymyza, milli medeniýetimize, beýik şahsyýetlerimize uly sarpa goýýan Gahryman Arkadagymyz: «Pederlerimiz şöhratly geçmiş taryhymyzyň biziň günlerimize gelip ýetmeginde uly işleri bitirdi. Häzirki nesilleriň borjy bolsa ony indiki nesillere ýetirmekdir» diýýär. Milli Liderimiziň ganatly sözlerinden ugur alyp, biz hem ýaş nesilleriň terbiýesinde geçmiş taryhymyza, milli gymmatlyklarymyza, beýik şahsyýetlerimize söýgi döretmekde yhlasymyzy gaýgyrmarys.
Kasymdurdy DURDYÝEW
Ýagşygeldi Kakaýew adyndaky
Halkara nebit we gaz uniwersitetiniň mugallymy
