Tebigat — çagalaryň beden, aň we duýgy taýdan kämilleşmegi üçin gaýtalanmajak giňişlikdir. Häzirki döwrüň şäherleşmegi we tehnologiýanyň ösmegi bilen, çagalaryň tebigatdan uzaklaşmak howpy barha artýar. Emma tebigat bilen ýakyn gatnaşygy bolan çagalar diňe bir sagdyn bolmak bilen çäklenmän, daşky gurşawa aladaly seredýän nesiller bolup ýetişýärler.
Tebigatyň Çagalaryň Ösüşine Täsiri
- Bedenterbiýe we saglyk: Açyk howada oýnamak çagalary işjeň ýaşaýşa iterýär. Tebigat, ylgamak, böküp düşmek, agaçlara dyrmaşmak ýaly fiziki işjeňlikler üçin çäksiz mümkinçilikleri hödürleýär. Şeýle hereketler çagalaryň myşsa ösüşini ösdürýär. Mundan başga-da, arassa howa we Gün şöhlesi olaryň immunitetini güýçlendirýär.
- Aň derejesiniň ösmegi: Tebigat çagalaryň döredijilik ukybyny artdyrýar. Ekranlaryň çäklendirilen dünýäsiniň ýerine, açyk howada oýnamak olara gözýetimi giňeldýän mümkinçilik berýär. Mysal üçin, bir agaç çaga üçin gala, bir şahajyk bolsa gylyç bolup biler. Bu bolsa, olarda öňünden çykýan meseleleri çözmek ukybyny ösdürýär.
- Duýgy deňagramlylygy: Tebigatda wagt geçirmek çagalaryň stresini azaldyp, emosional deňagramlylygyny üpjün edýär. Tebigat rahatlandyryjy täsir edýär. Çagalar guşlaryň owazyna diň salyp ýa-da çüwdürimiň şatyrdysyny duýup, içki asudalygyny tapýarlar.
Çagalaryň tebigat bilen gatnaşygy diňe bir olaryň şahsy ösüşi üçin däl, eýsem, daşky gurşaw hakyndaky düşünjesiniň artmagy üçin hem möhümdir. Tebigaty söýýän çaga ulalanda daşky gurşawy goramak aladasy bilen ýaşaýar. Ol agaçlary goramak, suwy tygşytly ulanmak ýaly möhüm meselelerde has duýgur bolýar.
Tebigat çagalar üçin gaýtalanmajak mugallymdyr. Olara öwrenmek, gözlemek we hyýal gurmak erkinligini berýär. Geljegimiz bolan çagalarymyz sagdyn we daşky gurşaw üçin jogapkär şahsyýetler bolsun diýsek, olaryň tebigat bilen gatnaşyklaryny güýçlendirmek ählimiziň borjumyzdyr. Tebigaty tanap, ony söýýän nesil dünýäni has amatly we ýaşalmak üçin ajaýyp ýere öwürer.
Mahym TAGANOWA
Aşgabat şäherindäki
78-nji ýöriteleşdirilen
orta mekdebiň mugallymy
