Berkarar döwletiň täze eýýamynyň Galkynyşy döwründe Arkadagly Gahryman Serdarymyzyň parasatly ýolbaşçylygynda bagy-bossana bürenýän eziz Diýarymyzda raýatlaryň saglygyny goramaklyga, berkitmeklige uly üns berilýär. Ýurdumyzda durmuşa geçirilýän ekologiýa syýasaty, halkymyz üçin amatly daşky gurşawy döretmek ýörelgesi amala aşyrylýan beýik, tutumly işler halkymyzyň göwün guşuny ganatlandyrýar.
Gündelik durmuşymyza ylmyň, tehnikanyň gazananlarynyň giňden ornaşmagy we sanynyň barha artmagy bilen daşky gurşawa ýetirilýän täsiri-de, täsiriň görnüşleri-de artýar. Daşky gurşawa ýetirilýän täsiriň öňüni almakda we täsiri peseltmekde tokaýlaryň, baglaryň, otag ösümlikleriniň ähmiýeti uludyr. Häzirki günlerde otag ösümliklerini idetmek, ýetişdirmek bilen gyzyklanýanlaryň we meşgullanýanlaryň sanynyň barha artmagy guwandyryjy hakykatdyr. Çünki otag ösümlikleri diňe bir daşymyzy gurşap alan dünýämize gözellik bermän, eýsem adamyň ýaşaýyş durmuşynda, saglygy berkitmekde we bejermekde aýratyn ähmiýete eýedir. Iş otaglarynda ýa-da aşhanalarda tehniki enjamlaryň uzak wagtlap işledilýän ýerlerinde adam saglygyna ýaramaz täsirini ýetirýändigini, ýagny otagyň içindäki otrisatel ionlaryň azalmagyna getirýändigini bu gün ylym tassyklaýar.
Beýik Britaniýanyň Birmingem we Reding uniwersitetleriň alymlar topary bu ugurda ylmy-barlag işlerini geçirdiler. Ylmy-barlaglaryň netijelerine görä, otag ösümlikleri içerdäki howanyň hilini ep-esli ýokarlandyrýandygyny görkezýär. Ylmy-barlaglara laýyklykda, otag ösümlikleri ýa-da gülleri otagyň içindäki dürli dem alyş keselleriniň döremegine sebäp bolup bilýän azot dioksidiniň möçberini ep-esli azaltmaga giň mümkinçilik berýär. Alymlar 15 inedördül metr meýdany bolan ofis otagyna 5 ösümlik ýerleşdirmegiň ýeterlikdigini belleýärler. Howa çalşygy pes bolsa-da, bu ösümlikler zyýanly gazlaryň derejesini 20 göterim azaldyp biler.
Güller – gözellik, gözelligi göreniňde bolsa göwnüň göterilýär. Ynsan özüniň ýaşyna, wezipesine, haýsy jemgyýetde ýaşaýandygyna garamazdan gülleri göreninde ýylgyranyny duýman galýar. Adamzady şeýle ýylgyrtmagy başartýan gülleriň sanyny köpeltmek, olara yzygiderli ideg etmek hem özüçe bir lezzetdir.
Jeren KULLAÝEWA
Aşgabat şäherindäki Saparmyrat Türkmenbaşy
adyndaky ýöriteleşdirilen umumybilim berýän
mekdep-internatynyň mugallymy
