Şu gün hormatly Prezidentimiz Serdar Berdimuhamedowyň gatnaşmagynda Aşgabatdaky Olimpiýa şäherçesiniň «Başa-baş söweş sungaty» sport toplumynda halkara ders bäsleşiklerinde, sport ýaryşlarynda baýrakly orunlara mynasyp bolan ýaşlary hem-de olaryň halypa mugallymlaryny we tälimçilerini sylaglamak dabarasy boldy. Oňa ýurdumyzyň ýolbaşçy düzümi, daşary döwletleriň, halkara guramalaryň ýurdumyzdaky diplomatik wekilhanalarynyň ýolbaşçylarydyr işgärleri, türgenler, talyplar gatnaşdylar.
Hormatly Prezidentimiz dabarada taryhy mazmunly çykyş edip, ýaşlary gazanan üstünlikleri bilen gutlady. Soňra ýeňijileriň hormatyna Türkmenistanyň Döwlet senasy ýaňlandy.
Hormatly Prezidentimiziň gol çeken resminamasyna laýyklykda, dünýä derejeli ders bäsleşiklerinde ýokary netijeleri gazanan mekdep okuwçylaryna, talyp ýaşlara hem-de olaryň halypa mugallymlaryna 40, 70 we 100 müň manat möçberde pul baýragy gowşuryldy.
Mundan başga-da, sportuň dürli görnüşleri boýunça geçirilen halkara ýaryşlarda altyn, kümüş we bürünç medallara mynasyp bolan türgenlerdir olaryň tälimçileri 40, 70 müň manat möçberde pul baýragy, şeýle hem 2025-nji ýylda goýberilen, ak reňkli «Toyota Camry HEV 2.5L» kysymly ýeňil awtoulaglar bilen sylaglanyldy.
Sylaglara eýe bolan ýaşlar ýadygärlik surata düşüp, belent münberden ýürek buýsançlaryny beýan etdiler.
THE ASHGABAT TIMES.
