Berkarar döwletiň täze eýýamynyň Galkynyşy döwründe ýurdumyzyň daşky gurşawy goramak bilen bagly döwlet syýasaty üstünlikli durmuşa geçirilýär. Tebigaty we daşky gurşawy goramak hakyndaky hukuk namalaryň hereket etmegi bu ugurda alnyp barylýan işleriň kanunçylyk esasyny berkitýär.
«Altyn Asyr» Türkmen kölüniň döredilmegi, ýylyň ýylyna geçirilýän köpçülikleýin bag ekmek çäreleri, şäher we oba ýerlerinde “ýaşyl zolaklaryň” giňeldilmegi — howanyň arassalygyny saklamaga, ýer-suw serişdelerini goramaga gönükdirilen döwlet syýasatynyň aýdyň subutnamalarydyr. Bu işler diňe bir häzirki döwre däl, eýsem geljekki nesiller üçin hem arassa we abadan durmuşyň binýadyny döredýär
Tebigat — adamzadyň ýaşaýyş çeşmesi. Suwy tygşytly ulanmak, daş-töwerege zibil taşlamazlyk, agaç ekmek ýaly ýönekeý hereketleriň her biriniň uly ähmiýete eýe bolýandygyny her bir raýat duýmaly. Tebigata aýawly çemeleşmek, ýaşyl dünýäni geljek nesillere miras goýmak biziň mukaddes borjumyzdyr.
Ýurdumyzyň daşky gurşawy goramak boýunça alnyp barylýan giň gerimli işler diňe bir ekologik howpsuzlygy üpjün etmek bilen çäklenmän, halkymyzyň bagtyýar durmuşynyň hem berk binýadyny döredýär. Arassa tebigat, ýaşyl zolaklar, tygşytly ýer-suw serişdeleri — bularyň hemmesi Berkarar döwletiň täze eýýamynyň Galkynyşy döwrüniň ösüşleriniň aýrylmaz bölegidir.
Zekeriýa ETREKOW
Halkara ynsanperwer ylymlary we ösüş
uniwersitetiniň talyby
