Bilim ulgamy her bir ýurduň, jemgyýetiň intellektual kuwwatynyň baş çeşmesi bolup durýar. Berkarar döwletiň täze eýýamynyň Galkynyşy döwrüniň häzirki ösüş tapgyrynda bilim ulgamyny özgertmek, onuň dünýä derejesindäki talaplara laýyk gelmegini üpjün etmek döwlet syýasatynyň ileri tutulýan ugurlarynyň biri hökmünde dowam etdirilýär. Bilim ulgamyndaky maksatnamalaryň üstünlikli durmuşa geçirilmegi netijesinde ýurdumyzda kämil, innowasion, sanly ulgama ornaşan bilim giňişligi kemala gelýär.
Soňky ýyllarda ýurdumyzyň ähli künjeklerinde döwrebap bilim edaralarynyň gurlup, ulanylmaga berilmegi bilim ulgamynyň ösüşiniň möhüm ugurlarynyň biridir. Täze umumybilim berýän mekdepler, çagalar baglary, orta hünär hem-de ýokary okuw jaýlary döwrüň talaplaryna laýyk maglumat-kommunikasiýa tehnologiýalary bilen enjamlaşdyrylýar. Bu bolsa, ýaş nesliň häzirkizaman şertlerinde okap-öwrenmegine giň mümkinçilikleri döredýär.
Bilim ulgamynyň sanlylaşdyrylmagy jemgyýetiň ähli ulgamlarynda giň gerimli sanly özgertmeleriň möhüm bölegidir. Elektron maglumat bazalarynyň döredilmegi, sanly sapaklaryň ornaşdyrylmagy, mugallymlar üçin elektron platformalarynyň ýola goýulmagy netijesinde, okuwlaryň hili we netijeliligi has-da ýokarlandy. Sanly bilim ulgamy ýaşlara diňe bir sapaklary geçmek üçin däl, eýsem döredijilik, gözleg hem-de taslama esasly işleriň ýerine ýetirilmegi üçin hem giň mümkinçilikleri berýär.
Bilim ulgamynda gazanylan üstünlikleriň esasylarynyň biri-de, ýokary hünärli mugallymlar toplumydyr. Soňky döwürde mugallymlaryň tälim-usulyýet taýýarlygyny kämilleşdirmek, halkara tejribelerini ornaşdyrmak, okuw programma üpjünçiligini dowamly döwrebaplaşdyrmak boýunça birnäçe işler alnyp barylýar. Halkara gatnaşyklarynyň giňemegi mugallymlaryň daşary ýurtlaryň okuw merkezleri bilen hyzmatdaşlyk edip, täze usullary öwrenmegine mümkinçilik berýär.
Batyr WELBEKOW
Ýagşygeldi Kakaýew adyndaky
Halkara nebit we gaz uiwersitetiniň talyby
