Häzirki zaman dünýäsi sanlylaşdyrma we awtomatizasiýa bilen berk baglanyşykly. Şol ugurlaryň içinde robot tehnologiýasy aýratyn orun eýeleýär. Robotlar diňe senagatda däl, gündelik durmuşda hem adamlaryň işini ýeňilleşdirýän, netijeliligi artdyrýan we täze mümkinçilikleri açýan enjamlardyr. Türkmenistan hem bu ugurda täzeçe pikirlenmäni ornaşdyrmak arkaly ykdysadyýetiniň dürli pudaklarynda ösüşe ýol açyp biler.
Robot tehnologiýasynyň ulanylmagy ilkinji nobatda senagatda we önümçilikde uly ähmiýete eýe. Awtoýygyn enjamlary, robotlaşdyrylan önümçilik liniýalary, ýokary takyklykly ölçeg ulgamlary – bularyň hemmesi önümçiligiň netijeliligini artdyrmaga, işçi güýjüni tygşytlamaga we ýokary hilli önümleri öndürmäge mümkinçilik berýär. Şeýle tehnologiýalar Türkmenistanda dokma senagatynda, gurluşykda we oba hojalygynda giňden ornaşdyrylyp bilner.
Oba hojalygynda robot tehnologiýasy aýratyn gyzykly mümkinçilikleri açýar. Ýerleri ekmekde, hasyly ýygnamakda, suwaryş ulgamynda robotlaryň ulanylmagy işiň tizligini we netijeliligini ýokarlandyrýar. Şeýle hem bu tehnologiýalar oba hojalygynda tygşytly energiýa sarp edişini we ýokary hilli önümçiligi üpjün edýär. Geljekde Türkmenistanda oba hojalygynda robotlaryň giňden ulanylmagy ýurduň azyk howpsuzlygyny berkitmäge hyzmat eder.
Robot tehnologiýasy bilim ulgamynda hem öz ornuny tapyp biler. Okuwçylara we talyplara robotlar arkaly programmirleme, inženerçilik we tehniki döredijilik öwredilse, täze nesil innowasiýa taýdan taýýarlanan hünärmenler bolup ýetişer. Bu bolsa ýurdumyzyň ylmy-tehniki ösüşiniň binýadyny berkitmäge mümkinçilik berer.
Netijede, robot tehnologiýasy Türkmenistanda diňe tehniki ösüş däl, eýsem ykdysadyýetiň, bilim ulgamynyň we gündelik durmuşyň täzeçe ösüş ýoludyr. Bu ugurda alnyp barylýan işler ýurdumyzyň geljegini has-da ýagtylandyrar we dünýäniň öňdebaryjy innowasiýa tejribeleri bilen deňleşmäge mümkinçilik berer.
Arslan JANMYRADOW
Türkmenistanyň Döwlet energetika institutynyň mugallymy
