Mekdep adamzat paýhasynyň kemala gelýän mukaddes ojagydyr. Şol sebäpli hem halkymyzda «Mekdep — ylym ojagy» diýen dana jümle döräpdir. Elbetde, ylym öwrenmek adamyň ömrüniň iň manyly we dowamly işidir. Bu ýoluň ilkinji we iň möhüm ädimleri bolsa mekdep bosagasyndan başlanýar. Mekdep — bu durmuşyň tarypyna sygmaz uly dünýäsine açylýan gapydyr.
Mekdep her bir şahsyýetiň zehininiň uçgunlaryny taplaýan mekandyr. Ol ýerde biz diňe bir okaýyş-ýazyşy däl, eýsem, älemiň syrlaryny, tebigatyň kanunlaryny we jemgyýetiň gurluşyny öwrenýäris. Mugallymlaryň berýän her bir sargyty, her bir sapagy geljekki uly üstünlikleriň binýadyny goýýar.
Mekdebiň ylym ojagy hökmündäki ähmiýeti sowatlylyk we bilimde has-da aýdyň ýüze çykyp, dünýägaraýşyň giňemegi we maglumatlary dogry seljermegi öwredýär. Şeýle hem ylym bilen bilelikde edep-ekramy, ula hormat, kiçä hezzet etmegi öwredýän mekandyr. Mekdep okuwçynyň haýsy ugra ukybynyň bardygyny ýüze çykaryp, geljekki hünärine ýol görkezýär. Mekdep ýyllarynda dörän dostluk gatnaşyklary iň berk we iň arassa gatnaşyklar hasaplanýar.
Häzirki ösen tehnologiýalar eýýamynda ylmyň we bilimiň gadyry has-da artdy. Döwrebap mekdeplerde öwrenilýän sanly bilimler, daşary ýurt dilleri we takyk ylymlar ýaşlaryň dünýä derejesinde bäsleşige ukyply bolmagyny üpjün edýär. Berkarar döwletimiziň bagtyýar ýaşlary üçin mekdep — iň gymmatly hazynadyr.
Gysgaça aýtsak, mekdep ynsanyň kämilleşýän ýeridir. Bu ojakda alnan her bir bilim damjasy geljekde beýik işleriň ummanyna öwrüler. Şol sebäpli mekdebi söýmek, mugallyma sarpa goýmak we ylym ýolunda zähmet çekmek her bir okuwçynyň mukaddes borjudyr.
Nowruza ZAKIROWA,
Farap etrabynyň 14-nji orta mekdebiniň mugallymy.
