Türkmenistanyň Hokkeý federasiýasy «Bitaraplyk kubogy» ugrundaky ýaryşyň iň gowy oýunçylarynyň atlaryny yglan etdi. Bäsleşigiň netijelerine görä, Türkmenistanyň Içeri işler ministrliginiň «Galkan» hokkeý klubynyň oýunçylary ähli ugurlar boýunça iň gowy diýlip yglan edildi. Hususan-da, Armen Mowsesýan ýaryşyň iň gowy derwezeçisi, Musa Annasaparow iň gowy goragçysy, Arslan Döwletmyradow bolsa iň gowy hüjümçisi diýen ada mynasyp boldular.
Bu sport bäsleşigi Türkmenistanyň hemişelik Bitaraplygynyň 30 ýyllyk baýramy mynasybetli guraldy. Türkmenistanyň Bedenterbiýe we sport baradaky döwlet komitetiniň goldaw bermeginde Hokkeý federasiýasy tarapyndan geçirilen ýaryşa jemi sekiz sany topar — «Galkan», «Nesil», «Watançy», «Merdana», «Bürgüt», «Oguzhan», «Şir» we «Alp Arslan» toparlary gatnaşdy.
Turniriň final duşuşygynda «Galkan» we «Şir» toparlary güýç synanşyp, IIM-niň hokkeýçileri 9:7 hasabynda uly ýeňiş gazandylar we kubogyň eýesi boldular. Üçünji orun ugrundaky bäsleşikde bolsa «Oguzhan» topary «Alp Arslan» toparyndan üstün çykyp, bürünç medallary eýelemegi başardy.
