Jemgyýetiň durmuş syýasatynda arassaçylyga aýratyn ähmiýet berilýär. Bilşimiz ýaly, arassaçylyk köpugurly meseledir. Şäherlerde we gaýry ilatly ýerlerde eýeçiliginiň görnüşine garamazdan, ähli edara, kärhana, guramalaryň binalarynyň we desgalarynyň, seýilgähleriniň, köçeleriniň, ýaşaýyş jaýlarynyň tämizligi döwletde dowamly gözegçilikde saklanylýar. Arassaçylyk şahsy gigiýenanyň meselelerini hem öz içine alýar.
“Arassaçylyk – saglygyň girewidir” diýen pähimi hemmämiz bilýäris. Ýaşlar ilkinji nobatda şahsy arassaçylygyň nusgasy bolmalydyrlar. Olar ýatlatmazdan wagtynda saç-sakgalyny timarlap durmaly, el-aýagynyň dyrnaklaryny wagtynda almaly, günüň dowamynda birnäçe ýola ellerini sabynlap ýuwmaly, suwa düşmeli. Ýaşlar barýan ýerine laýyklykda sadadan arassa geýinmäni başarmaly, eşikleri elmydama ütükli bolmaly. Oglanlar ýaşaýan ýerlerinde şahsy otaglaryny özleri tämizläp durmany, gyzlar bolsa, geljekki özbaşdak maşgala durmuşyna taýýarlyk hökmünde bütin öýi (howlyny) arassa saklamaga endik edinmelidirler.
Howlyňy hem öýüňi arassa, tämiz hem-de rejeli sakla! Arassalyk we päkizelik köňlüň islegidir, çünki köňülde Allanyň ady ýazylandyr. Çagalaryňa her gün öýi syryp-süpürip, arassa hem tertipli saklamagy, howlyny tämiz saklamagy endik etdir! Gerek bolsa, özüňem kömekleşmegi kiçilik bilme!
Öýüňi, howlyňy hamana myhman çagyrylandaky ýaly tämiz sakla! Şonda birnäçe gün öňünden syryp-süpürýärsiň, adaty bolşuňdan has tertipli, has göreldeli bolmaga jan edýärsiň. Näme üçin sen diňe myhmanyň däl, eýsem, öz öňüňde şeýle görünmeli däl, näme, özüň myhmança ýokmy?
Öýüňdäki tertip maşgalaňdaky tertip bilen sazlaşsyn. Ýersiz goh-galmagal, oňşuksyzlyk, biri-biriňe sowuklyk öýüň göwnüni ynjydýandyr. Tertip-düzgün üçin atanyň başçy, enäniň serenjamçy bolmagy gerekdir.
Oguldurdy BABAÝEWA
Daşoguz welaýatynyň Beki Seýtäkow adyndaky
mugallymçylyk mekdebiniň 2-nji ýyl talyby
