Hormatly Prezidentimiz ýurdumyzyň agrosenagat pudagyny döwrebap ösdürmek, azyk bolçulygyny pugtalandyrmak babatda buýsanja mynasyp işleri durmuşa geçirýär. Oba hojalyk ekinlerinden ýokary hasyl almak, maldarçylyk önümleriniň möçberini artdyrmak ugrundaky tagallalar şeýle diýmäge esas berýär. Buýsandyrýan zatlaryň biri-de täze taryhy döwrümizde döwrebap maldarçylyk toplumlarynyň yzygiderli açylyp, ulanylmaga berilýändigidir.
Gahryman Arkadagymyzyň oba hojalyk pudagyny toplumlaýyn ösdürmek we döwrebaplaşdyrmak boýunça başlangyçlary häzirki wagtda hormatly Prezidentimiziň baştutanlygynda üstünlikli durmuşa geçirilýär. Bu ugurda maldarçylyk pudagyny döwrebap esasda ösdürmäge aýratyn ähmiýet berilýär. Şunuň bilen baglylykda, ýurdumyzda maldarçylygy, hususan-da, dowardarçylygy, guşçulygy, düýedarçylygy ösdürmek işi ýerli howa şertlerini, ot-iým üpjünçiligini göz öňünde tutmak esasynda alnyp barylýar. Azyk bolçulygyny döretmek maksady bilen, öňdebaryjy dünýä tejribesini öwrenmäge we ornaşdyrmaga, bu ugurda halkara hyzmatdaşlygy giňeltmäge uly üns berilýär.
Hemişelik Bitaraplygymyzyň şanly 30 ýyllygynyň bosagasynda hormatly Prezidentimiziň gatnaşmagynda Maldarçylyk we guşçulyk senagaty döwlet birleşiginiň «Altyn halka» döwlet kärhanasynyň täze maldarçylyk toplumynyň işe girizilmegi has-da guwandyryjy wakalaryň biri boldy. Döwrebap maldarçylyk toplumynyň çäginde jemi 500 baş maly saklamaga niýetlenen bölümleriň üçüsiniň, 200 baş göle saklanýan bölümleriň ikisiniň, sagym bölüminiň, ot-iým meýdançasynyň, ýapyk görnüşli iým ammarynyň, şeýle-de toplumyň işini döwrebap usulda alyp barmak we mallaryň idegini sanly ulgam arkaly dolandyrmak üçin beýleki degişli desgalaryň bolmagy diýseň begendirýär.
Berkarar döwletiň täze eýýamynyň Galkynyşy döwründe azyk bolçulygyny has-da pugtalandyrmaga, bäsdeşlige ukyply önümleriň önümçiligini artdyrmaga gönükdirilen beýik işleri durmuşa geçirýän hormatly Prezidentimize we Gahryman Arkadagymyza tükeniksiz alkyşlarymyzy aýdýarys.
Batyrguly ÖWLÝAGULYÝEW,
Türkmenistanyň Agrar partiýasynyň Halaç etrap komitetiniň başlygy.
