Parahatçylygyň we dostlugyň mekany hasaplanylýan Garaşsyz, baky Bitarap Türkmenistanyň mermer paýtagtynda ençeme iri sport ýaryşlarynyň üstünlikli geçirilmegi dünýäniň sport jemgyýetçiligi tarapyndan ýurdumyza bildirilýän uly ynamyň, bedenterbiýäni we sporty ösdürmek, wagyz etmek, bu ulgamda halkara hyzmatdaşlygy pugtalandyrmak ugrundaky tagallalaryň doly ykrar edilýändigini görkezýär.
Dünýä halklarynyň arasynda dost-doganlygy, parahatçylygy we raýdaşlygy berkitmekde sportuň uly ähmiýete eýedigi taryhyň ykrar eden hakykatydyr. Şoňa baglylykda, parahatçylygyň, dostlugyň we ynanyşmagyň çeşmesi hasaplanýan sport halkara gatnaşyklarynyň esasy ugurlarynyň biri hökmünde kesgitlenýär. BMG-niň Baş Assambleýasynyň 78-nji sessiýasynda Türkmenistanyň başlangyjy bilen hem-de Milletler Bileleşigine agza döwletleriň biragyzdan goldamagynda «Birleşen Milletler Guramasynyň oýunlary» atly Kararnamanyň kabul edilmegi hem munuň aýdyň subutnamasy boldy. Bu resminamanyň kabul edilmeginiň gözbaşynda sport arkaly ynsanperwerligiň wagyz edilmeginiň, ynanyşmagy ýaýbaňlandyrmagyň dünýäde parahatçylygy we abadançylygy berkarar etmek babatdaky umumadamzat ähmiýeti aýdyň şöhlelenýär.
Halkara parahatçylyk we ynanyşmak ýylynda «Galkynyş» milli at üstündäki oýunlar toparynyň Monako Knýazlygynda geçirilen Monte-Karlo halkara sirk sungaty festiwalynda Altyn baýraga hem-de ýörite baýraklara mynasyp bolmagy, «Arkadag» futbol toparynyň uly ýeňiş gazanyp, Aziýanyň Futbol konfederasiýasynyň Çagyryş ligasynyň çempiony bolmagy eziz Diýarymyzda ýokary netijeli sporty we Olimpiýa hereketini ösdürmek boýunça Gahryman Arkadagymyzyň binýadyny goýan, Arkadagly Gahryman Serdarymyzyň paýhasly baştutanlygynda dowam etdirilýän köptaraply işleriň bütin dünýäde rowaçlanýandygynyň aýdyň subutnamasy boldy.
Türkmen ýaşlary sporty, bedenterbiýäni özleriniň durmuşlarynda kadaly endige öwürdiler. Bedenterbiýäniň hem-de sportuň ýörelgesinde kemala gelýän ýaşlarymyz bu gün belent ruhly, giň dünýägaraýyşly, beden taýdan sagdyn nesillerdir. Bütin dünýäde parahatçylygy, durnukly ösüşi, dost-doganlygy dabaralandyrýan sport diplomatiýasynyň rowaçlanmagy ugrunda çäksiz aladalary edýän, köptaraply işleri durmuşa geçirýän Gahryman Arkadagymyzyň, Arkadagly Gahryman Serdarymyzyň janlary sag bolsun, il-ýurt bähbitli alyp barýan işleri üstünliklere beslensin!
Nowruz JALAÝEW,
Tejen etrap sport mekdebiniň instruktor-usulyýetçisi.
