Hormatly Prezidentimiziň ýurdumyzyň hemişelik Bitaraplygynyň şanly 30 ýyllygynyň giňden bellenilýän günlerinde neşir edilen «Türkmenistanyň Bitaraplygy — parahatçylygyň we ynanyşmagyň aýdyň ýoly» atly täze kitaby giň okyjylar köpçüliginde uly gyzyklanma döretdi.
Arkadagly Gahryman Serdarymyzyň köňül ylhamyndan, çuňňur paýhasyndan dörän «Türkmenistanyň Bitaraplygy — parahatçylygyň we ynanyşmagyň aýdyň ýoly» atly ajaýyp kitaby biz ― geljekki žurnalistler üçin bahasyna ýetip bolmajak sowgatdyr. Çünki bu eserde Birleşen Milletler Guramasynyň Baş Assambleýasy tarapyndan üç gezek ykrar edilen hemişelik Bitaraplygymyzyň ähmiýeti, dünýäde parahatçylygy we ynanyşmagy üpjün etmäge gönükdirilen taryhy başlangyçlar giňden beýan edilip, ýurdumyzda ýetilen belent sepgitleriň, gazanylan üstünlikleriň jemi jemlenýär. Kitabyň bölümlerinde halkymyzyň parahatçylyk söýüjilik, dostluk ýörelgeleri dogrusynda taryhy delilleriň üsti bilen gürrüň berilýär.
Parahatçylygy durmuşyň sazlaşygyna deňeýän hormatly Prezidentimiz täze kitabynda «Bitaraplyk» düşünjesiniň taryhy köklerinden başlap, onuň ähmiýetini, dünýäde asudalygy pugtalandyrmakdaky ornuny giňişleýin açyp görkezýär. Parahatçylyk umman deý çuň, asman deý giň, daglar deý belent manylary özünde jemleýär. Bu düşünje döwlet Baştutanymyzyň kitabynda şeýle beýan edilýär: «Parahatçylyk biziň şu günümizde ýerine ýetirmeli mukaddes wezipämizdir. Parahatçylyk geljege sowgadymyzyň iň gymmatlysydyr. Parahatçylyk türkmen siwilizasiýasynyň ýüregidir, onuň umumy maksadydyr, adamzat kalbynyň iň belent arzuwydyr».
Arkadagly Gahryman Serdarymyz «Türkmenistanyň Bitaraplygy — parahatçylygyň we ynanyşmagyň aýdyň ýoly» atly kitabynda: «Geliň, bu parasatly ýoly — parahatçylyk ýoluny bilelikde dowam edeliň! Geliň, adamzadyň geljegini bilelikde guralyň! Geliň, dünýäniň her bir künjeginde parahatçylygy dabaralandyrmaga goşant goşalyň! Geliň, geljek nesillere, parahat dünýäni miras galdyralyň!» diýip, bütin adamzady asuda durmuşa, parahat ýaşaýşa çagyrýar. Bu bolsa biz ― ýaş nesiller üçin nusgalyk mekdepdir.
Tumar GURBANGULYÝEWA,
Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 3-nji ýyl talyby.
