Dogrudanam, enelerimiziň asylly gylyk-häsiýetlerinden gözbaş alyp gaýdýan edep-terbiýe mekdebi örän baý. Aýratyn hem maşgalanyň bikesi bolup ýetişmeli gyzlaryň edep-terbiýesi, edim gylymy bilen bagly öwüt-ündewler durmuşymyzyň bezegidir. Halkymyzda «Edep altyndan gymmat» diýen nakyl bar. Gyz edepli bolanda kalbyňy mähir nury bilen çoýýar. Zenan terbiýesine degişli gyzyldan gymmatly pähimlerine ýüz tutsak «Edep zenan üçin geýim ýalydyr», «Edep bir täçdir, şol täji geýen zenan her beladan gutular», «Enäniň mähri zor, terbiýesi zer», «Asuda maşgalanyň gelni edepli, ol ojagyň duzy tagamy datly», «Edep bilen bagt tapylar, sabr bilen tagt» ýaly dana pähimler nesillerimiziň terbiýesinde möhüm ähmiýete eýedir.
Ilimizde geýinmegiň edebine hem aýratyn üns berilýär. Gyz-gelinleriň özüne laýyk ýerbe-ýer , ykjam, gelşikli geýinmegi oňlanylýar. Ata-babadan gelýän uzyn köýnekler zenanlaryň kaddy-kamatyny juda bezäýer. Toý-tomguda, baýramçylyk çärelerinde milli egin eşiklerimiz bilen şaý-seplerimizi sazlaşdyryp geýinýän we dakynýan gözellerimiz mizemez mirasymyzyň teşneleridir. Hatda, halk döredijiliginde-de gyz-gelinleriň gözelligi bilen birlikde, edep-terbiýesini hem beýik şahyrymyz Magtymguly Pyragy:
Hyrydar bolsaňyz gyza, geline,
Edebin, ekramyn, otyrşyn görüň.
— diýip, wasp edipdir. Gözelleriň edebine, mylaýym hoşgylawlagyna ýokary baha beripdir.
Maşgala agzybirligi ojakdan başlanýar. Ojagyň oduny söndürmän saklaýan zenandyr, şonuň üçin Gahryman Arkadagymyzyň, Arkadagly Gahryman Serdarymyzyň tagallasy bilen eneleriň, çagalaryň saglygyny goramak, olaryň ömrüni uzaltmak boýunça-da uly işler alnyp barylýar.
Ogulnur TAGANOWA
Türkmen oba hojalyk institutynyň
Daşoguz agrosenagat orta hünär
okuw mekdebiniň mugallymy
